Man Hater

Gula 75

Kini maoy nakadugang sa kahigwaos nga iyang bation ilabi na sa mamingaw’ng mga takna sa kagabhion nga maghunahuna siya sa dalaga.

Nakapanghupaw ug nakapanglingo si Yuri samtang padayon nga naglantaw ngadto sa gawas sa bentana. Wala siya masayod kun unsay iyang buhaton aron motuo ug mosalig na si Salie kaniya. Maglisod siya sa pagpasabot sa dalaga sa matuod niyang gibati tungod kay modayon man kini’g kasuko sa higayon nga mosugod na siya’g esplikar.

Tak-opan na unta pagbalik ni Yuri ang bentana sa dihang kalit siyang napahunong. Mitingkag ang iyang mga dalunggan ug wala tuyoa nga nanglimbawot ang iyang mga balhibo. May nakita siyang kilab sa usa ka anino nga naghupo sa labong nga mga tanom sa ilang nataran. Dili mahitabo nga masayop siya. Anino sa usa ka tawo ang iyang nakita.

Midali si Yuri sa pagbiya sa bentana ug nagkinto ang mga lakang nga mipaingon sa pultahan sa iyang lawak. Mainampingon niyang giablihan ang palid sa pultahan aron dili makamatikod kaniya ang iyang mga ginikanan ug igsuon nga nahinanok na pag-ayo.

Migawas si Yuri sa sala. Palong na ang suga didto. Mipaingon siya sa bentana sa sala ug milili ngadto sa gawas. Sukad sa iyang nahimutangan bantang na kaayo sa iyang panan-aw ang nataran. Gipanid-an niya kadtong anino nga iyang nakita kaganina sulod sa iyang kuwarto.

Mihakop kang Yuri ang kakulba sa dihang nakita na usab niya ang anino. Naghupo kini sa mga tanom apan sa matag karon ug unya motuyhakaw ang ulo niini, sama sa nagpaniid sa sulod sa ilang balay. Dili niya maila ang nawong niini tungod kay wala kini maigo sa kahayag sa sugang dagitabnon sa poste sa unahan.

Karon pa makamatikod si Yuri nga wala diay niya madala ang iyang service pistol nga .45 kalibreng pistola. Atua kini sa iyang lawak. -- Sumpayan pa