Gula 6
Nagdali nga mitindog si Ben. “Kaabtik baya niya nga mitindog uy,” giingnan ni Dorinda si Ben. Gibayaran ni Ben ang ilang nainom ug giagbayan niya si Dorinda pagawas sa Wildflower, usa ka diskohan diha sa Salinas Drive sa Lahug.
“Asa man ta mamahuway ba?” daw nagpatuso-tuso si Dorinda apan wala na motingog si Ben, gipasirit niini ang motorsiklo niini dihang nakaangkas na ang dalaga.
Gikan sa Salinas Drive misirit si Ben paingon sa Mabolo, dayon miliko sa wala subay sa gagmay nga mga karsada hangtud nga nahiabot sila sa duha ka nag-atbang nga motel.
Migunit si Dorinda sa hawak ni Ben ug gipaud ang iyang ulo sa buko-buko sa reporter aron dili makita ang iyang panagway sa mga taxi driver nga nanagpaabot og mga pasahero sa gawas.
Diritso nga gipasulod ni Ben ang motorsiklo niadtong bakante nga grahe ug abtik usab kaayo ang roomboy nga misirado. “Abli na ang pultahan Sir ug andar na daan ang aircon,” giingnan sila sa roomboy.
“Salamat kaayo nga miuban ka nako dinhi ha?” matud ni Ben dihang giagbayan niya si Dorinda pagsaka sa hagdan. Migakus usab si Dorinda sa hawak ni Ben. Nagtinutokay silang duha pagsulod nila sa kwarto.
Wala maglangan og oras si Ben. Iya dayong giparaygan si Dorinda, gihapohap ang kalawasan dungan sa pag-ukobay sa masi’g nila ka mga ngabil. Kadto maoy nagsugnib og dili matukib nga kainit sa ilang kalawasan.
Gipawong ni Ben ang suga nga diha sa kisame ug ang nagdan-ag kanila mao ang suga nga diha sa ulohan sa higdaanan. Misukol si Dorinda sa pagpakigparayganay kang Ben. Mikilab lang ang mga gutlo ug gisaw-an na nila ang kalipay.
Alang ni Ben, bisan og may anak na si Dorinda apan wala gihapo’y kalainan sa usa ka dalaga ang iyang lawas. Bigot gihapon kini’g lawas, ilabi na ang igwad niini nga sampot nga maoy naghatag og dugang kamadanihon sa iyang bayhon.
Pareho sila si Ben ug Dorinda nga nangaluya human sa unang hugna sa ilang kumbati. Dihang daw mikalma na ang nagbutok-butok nilang dughan sa kakutas, miarangkada na usab si Ben.
Wala usab magpalupig si Dorinda sa kumbati. Nakatagpilaw sila’g kadiyot human sa ikaduha nga hugna sa ilang pagparayganay. “Uy, tana Ben alas dos na man diay sa kaadlawon, nangita na g’yud to ron si Nanay nako,” matud ni Dorinda dihang nahigmata na ang reporter. (Sumpayan)