Man Hater - Gula 73

“Wa’y mapili ninyong mga lalaki!” Nahinumdom si Yuri sa gisulti ni Salie kaniya niadtong higayon nga mipadayag siya sa iyang gugma. Naglanoglanog karon sa lawak sa iyang kaisipan ang mga pulong sa dalaga. “Mga bakakon! Malimbongon! Mapahimuslanon!”

Nakapanghupaw si Yuri. Pipila na ka gabii nga naingon siya niini dili makatulog. Magpunay lang siya’g hunahuna kang Salie. Unsay iyang buhaton aron motuo na ang dalaga sa kamatinud-anon sa iyang gugma? Kining maong pangutana ang gipangitaan og tubag ni Yuri sa daghan nang mga gabii nga wala siya’y kinatulgan.

Mibangon na lang si Yuri kay dili gayod siya makatulog. Gihamok siya’g maayo sa paghunahuna kang Salie. Kun piyongon na niya ang iyang mga mata, makita na hinuon niya sa tumang kabulto ang matahom nga panagway ni Salie nga nagkatawa, sama sa iyang anghel nga magbalantay nga naghadla kaniya.

Matahom gayod si Salie. Kun usa pa lang siya ka magbabalak, sulayan gayod niya ang paghan-ay og mga pulong aron pagtagik sa nagbanaag nga katahom sa dalaga. Nalamat pag-ayo si Yuri sa kaanyag ni Salie.

Mihinay si Yuri sa pagpaingon sa bentana. Iyang gibuksan paghinay ang bildo sa bentanang jalousie. Milantaw siya gawas. Mingaw na gayod ang palibot. Nakita niya ang sugang dagitabnon nga nagsiga sa poste nga nagbarog dili layo sa nahimutangan sa ilang balay. Bugnaw kaayo ang hangin nga misulod sa bentana ug mihikap sa iyang panit.

Pagkamingaw na gayod sa kalibotan. Apan ang hunahuna ni Yuri gihasol sa paghunahuna kang Salie. Gubot ang iyang kaisipan.

Nabati niya ang hinagok sa iyang mga ginikanan sa pikas nga lawak. Wala na usay timik ang lawak ni Rose, iyang manghod. Nagtuo siya nga natulog na usab kini human magtuon sa mga leksiyon sa tunghaan. Kaganina rang gipalong ang suga sa lawak sa iyang manghod.

Gitaliwad-an sa lawak sa iyang mga ginikanan ug sa lawak sa iyang manghod ang lawak nga katulganan ni Yuri. Dili gayod siya mahikatulog tungod sa kahasol nga mikumpayot sa iyang hunahuna. -- Sumpayan pa