Dili moatubang

Dear Tita Salie,

Have a nice day. Just call me Rhaze, usa ka dalaga. Mangayo lang unta ko nimo’g help concerning sa akong problema.

Ang akong problema is about this cousin of mine. Dili ko kasabot niya kun nganong permi lang mi dauton niya. Kanunay mi itsismis ngadto sa laing mga tawo. Maayo kaayo siya moimbento og estorya mahitungod sa akong pamilya.

Sa una ang akong ate ang iyang natripan. Gidaut niya ang akong ate ngadto sa among mga silingan. Maayo unta kun tinuod pa ang iyang gipadagan nga estorya, pulos gyud bakak, Tita. Ug karon ang ako na pong mama ang iyang gihimoan og estorya. Mahadlok ko kun magubot kay masakiton ra ba ang akong inahan.

Luoy lang kaayo siya kay dili man mutoo ang mga tawo niya ug siya na nuon ang nahulog nga daotan. Unsa kahay akong buhaton, Tita, kay kun ako siya pakigkitaan aron akong nawngon pag-estorya dili man moatubang nako. Magtagotago siya. Wala gyud ko kasabot kun unsay iyang tumong ngano nga iya ming hilabtan, Tita.

Palihog pasabta ko ug sultihi ko sa angay nakong buhaton. Daghang salamat sa pagtagad. -- Rhaze

* * *

Good day, Rhaze,

 Aduna gyu’y mga tawo nga mga wala’y lingaw sa ilang kinabuhi gawas sa ilang pagpanumbay aron maghatod sa mga estorya ug chika mahitungod sa laing tawo. Mao kini sila ang atong gitawag nga mga tsismosa. Dili sila mahiluna kundili sila maka-estorya og something nga kontra sa ubang mga tawo kalipay nila ang dauton ang laing tawo.

Tingali kun dunay kasuya ang inyong ig-agaw ngadto sa inyong pamilya kay sa kadaghan sa mga tawo nganong kamo man gyud ang iyang napilian nga dauton. Busa suwaye pagsubay ang lintunganay sa problema kun unsay hinungdan nga iya man kining gibuhat kaninyo.

Kundili siya moatubang kaninyo o kanimo pakigkita-i ang iyang mga ginikanan ug pakigsulti mahitungod sa gibuhat sa ilang anak aron ang iya nang ginikanan ang maantigo modisiplina sa ilang anak.

Apan kun human nimo maestorya ang iyang mga ginikanan ug wala lang gihapoy kausaban, dangop sa inyong barangay aron didto ka mangayo og husay. Ipatawag siya sa barangay aron matubag niya kun unsa gyod ang iyang tumong sa pagdaut kaninyo, ug pinaagi niini mohunong na siya sa iyang bisyo aron dili siya makabayad kaninyo sa iyang pagguba sa inyong pagkatawo. -- Tita Salie