Niadtong panahon ni Haring Nebukadnesar sa Babilonia, nagpabarog ang hari og usa ka estatuwang bulawan sa kapatagan sa iyang gingharian. Ug iyang gipatawag ang iyang mga sinaligan, sama sa gobernador, mga magtatambag, tresurero, mga maghuhukom ug nagsugo siya.
“Akong gihimong balaod nga bisan kinsa nga makadungog sa mga musika, sama sa tulungon, harpa, lira, mohapa ug mosimba sa rebulto nga bulawan nga akong gipabarog. Ug bisan kinsa nga dili mohapa ug mosimba sa rebulto nga bulawan, itambog siya didto sa hudno nga nagdilaab sa kalayo.”
Pila lang ka adlaw ang milabay, may usa ka tawo nga misumbong ngadto sa hari.
“O Haring Nebukadnesar, mabuhi ka sa walay katapusan. Dunay tulo ka Hebrewhanon, sila si Sadrak, Mesak ug Abednego, wala mohapa ug mosimba sa rebultong bulawan nga imong gipatindog.”
Gipatawag dayon sa hari ang tulo ka Hebrewhanon. “Tinuod ba nga wala kamo mosimba sa rebultong akong gipatindog ug nahibalo ba mo nga ang silot itambog ngadto sa hudno sa kalayo?”
Og mitubag ang tulo ka Hebrewhanon.
“Ang Diyos nga among gialagaran, o hari, magaluwas kanamo gikan sa hudno sa kalayo ug sa imong mga kamot, apan kun dili man, dili gayud kami mosimba sa rebultong bulawan nga imong gipatindog.”
Gisugo dayon sa hari nga initon sa makapito ang hudno ug gipatambog ang tulo ka Hebrewhanon. Tungod sa kainit sa hudno, nangasunog ug nangamatay ang nagtambog sa tulo ka Hebrewhanon nga mga ginapos. Samtang nagtan-aw ang hari sa hudno, nangutana kini.
“Di ba tulo ang gitambog nga ginapos? Ania karon, upat ang akong nakita nga wala nay gapos nga naglakaw sa kalayo ug ang ika-upat ingon sa anak sa mga diyos.” Busa si Nebukadnesar misinggit.
“Sadrak, Mesak ug Abednego, mga sulugoon sa Hataas Uyamot, panggula mo diha ug ngari diri.”
Busa nanggula ang tolo ka Hebrewhanon ug nakita sa mga sinaligan sa hari ug mga gobernador nga ang kalayo walay gahom sa tulo nga bisan ang ilang mga sapot ug buhok wala dutli sa kalayo ug bisan baho na lang sa kalayo. Ug namulong ang hari!
“Pagadaygon ang Diyos ni Sarak, Mesak ug Abednego nga nagsugo sa iyang anghel aron luwason ang iyang mga suluguon. Busa, gihimong balaod nga si bisan kinsa nga magsulti og dautan batok sa Diyos nila ni Sadrak, Mesak ug Abednego, paga-kuniskunison ang ilang mga lawas ug ang ilang mga balay, paga-gub-on.”
Ug gibutang sa hari sa tag-as nga katungdanan ang tulo ka Hebrewhanon sa gingharian sa Babilonia. (Katapusan)