Gula 2
Ang inahan diay ni Dorinda ang miabot nga nagpahibalo sa iyang anak nga wala gayud kini makakita’g kwarta nga ikapalit og tambal para sa iyang apo.
“Hala.. unsaon nako pagbayad ron Nay. Nadapatan na og tambal si Inday kay gipalit man niya ang mga giresita Nay,” matud ni Durinda nga mitudlo kang Ben nga naminaw ra sa inahan ug anak.
“Walay problema Dorin. Gamay ra man to nga kantidad. Tabang na lang to nako nimo,” matud ni Ben. Nagpaila si Ben kang Dorinda nga usa ka reporter sa radyo. Nakalit lang kamaya ang dagway sa inahan ug anak dihang nagpaila si Ben kanila.
Diha pa nahibaw-i ni Ben nga sila si Dorinda ug ang iyang inahan mga tigpaminaw diay sa sibyaanan nga iyang gialagaran isip reporter. “Hala nakakita na g’yud mi nimo. Ikaw diay na nga among pirmi madunggan nga moreport sa radyo?”
Miduol ang nurse kanila nga may gitunol nga resita kang Dorinda. “Diay laing giresita ang doktor para sa imong anak. Palita na aron kamo makapauli na,” matud sa nurse.
Kalit lang mikisdom pagbalik ang dagway ni Dorinda. Napahit sa inahan ni Dorinda ang iyang ngabil. “Paita ning atong kahimtang Dorin uy.”
Gihinay pagkuha ni Ben ang resita nga gikan sa mga kamot ni Dorinda. “Ayaw kabalaka Dorin, ako gihapo’y mopalit niining tambal. Sulbaron nato ang imong problema,” matud ni Ben nga mibiya paingon sa botika.
Wala madugay mibalik si Ben nga dala na ang tambal. Gi-injection dayon kini sa nurse ngadto sa bata. “Mahimo na kamo nga mopauli day.”
“Magpasalamat g’yud mi kaayo nimo Ben. Pwede ko mangayo nimo og contact number?” matud ni Dorinda. Gikuot ni Ben ang iyang pitaka ug mikuha siya og calling card.
“Ayo-ayo mo Dorin, Nang. Diay P200 iplete ni ninyo sa taxi kay aron dili kamo maglisud pagpauli,” matud ni Ben. Nakatutok si Dorinda kang Ben dihang gidawat niya ang kwarta. “Daku na kaayo ang utang-kabubut-on namo nimo Ben,” ni Dorin pa.
Si Ben mismo ang mipara og taksi para sa inahan ug anak. Gisugid ni Ben ngadto sa iyang mga kaubang reporters ang pagtabang niya sa pasyente nga nanginahanglan og tabang.
Paglabay sa usa ka semana, nakadawat si Ben og text message gikan ni Dorinda. “Bisita diri sa balay. Birthday karon ni Inday, pinobre lang gud.” Gihatagan ni Dorinda og ideya si Ben kun asa ang ilang balay. (Sumpayan)