Gula 74
“Kaganina ra kong nakaalinggat niini. Nalipay kong nia ka.”
“Pag-ayo-ayo. Paninguha gyud nga modaog mo.
“Buhaton ko ang kutob sa akong mahimo. Ipahinungod ko kining duwaa nimo.”
Unya mibalik na si Robert ngadto sa nahimutangan sa mga kauban niyang player. May instruction nga gihatag ang ilang coach. Wala madugay gisugdan na ang 3rd quarter sa dula.
Unang mi-score ang team ni Robert. Mibalos pag-score ang team ni Erik. Mitira og 3 points si Robert. Mitubag pud pagsulod og 3 points si Erik. Nagbalos-balos pagkamada og puntos ang duha ka team. Natapos ang 3rd quarter nga tabla gihapon ang score 79-79.
Pagsugod sa 4th quarter ingon sa kalit lang namugnaw ang team nila ni Robert. Nabiyaan na sila’g 10 points sa team ni Erik. Nainat pa gyud ang labaw ngadto sa dose puntos dihang singko minutos na lang ang nahibilin sa dula.
Mipatawag og time out ang team nila ni Robert. Mihatag kini’g dugang instruction kanila. Wala lang tuyoa nakalantaw si Robert ngadto sa nahimutangan ni Angeline. Nagkatagbo ang ilang mga tinan-awan. Si Angeline misinyas nga kinahanglan dugangan ni Robert ang iyang effort aron modaog ang ilang team. -- Sumpayan pa