Gibangon sa kanhing nahidakin-as

Tangkod pa lang gani nga upat ka adlaw, sukad makagawas si Oming, sa may dakong prisohan ning ilang lungsod sa San Fernando, sa salang pagpangawat og kahayopan, sama sa baka, ug pagpanaka sa kabalayan, atol sa tungang gabii, kay nasawod na sa iyang dunggan ang nagkagrabe nga kinawatay ning ilang dapit sa balangay sa Tinubdan.

“Labaw pa kana sa kanhi nimong binuhatan Oming, gumikan ning droga nga maoy bugtong hinungdan nga midagsang kining mga lain-laing bisyo.

Igo lamang miduko si Oming sa iyang nadunggan ni Laydang, kay lakip ang iyang anay nga umaanak nadala sa mga binuang sa mga kawatan sa ilang dapit.

“May adlaw ra Laydang nga masumpo ko kanang mga dautang bisyo!” prangka nga namulong si Oming nga nakapanakla.

Miabot nalang ang paglabay sa nanglabay’ng semana. Nagka-grabe na hinuon ang kinawatay, kay lakip ang bugtong kabaw sa ilang silingan nga igdadaro giapil usab og kawat kay gibaligya sa Lorega.

Tungang gabii kadto. Kusog kaayo ang pagbunok sa ulan. Mingaw ang palibot. Taudtaod gipanid-an ni Oming, kun kinsa gayod ang kiriwan. Maampingon siya nga nag-atang sa may mingaw nga dapit, binitbit ang iyang penute nga hilabihan kahait ang suwab. Hinay ang iyang mga lakang nga dili makadapit og kasikas.

Hangtud nga may anino siya nga nasigpatan nga nagbitbit og himungaan. Andam na ang iyang paghuyad aron iyang hunosan sa kinabuhi.

Ang kinidlap sa kilat maoy nakapayanghag ni Oming, kay iya man nga nahimay-ongan si Kumpare niya Bartolo nga abtik kini nga midagan.

Iya kining gisinggitan. Wa gayod kini manumbaling kaniya, hangtud nga iya kining gigukod.,

“Pre... ikaw man lagi diay kini? Palihog lang ibutang kanang himungaan nga imong gibitbit, aron di ko ikaw lunggoan sa imong liog ning wa maglito kong penute!” ni Oming pa nga nagpangagot ang bag-ang.

“Ayaw intawon ako patya Pre!” nagpakiluoy kaniya ang iyang Kumpare. Miluhod kini kaniya.

“Nahibalo ba ka Pre Bartolo .... nga gumikan sa pagpangawat og kahayopan mao kanay nakapabilanggo kanako!” luhaan nga namulong si Oming.

“Igo lang ako nga motambag kanimo ... nga hunonga na intawon kanang way hinungdan nimong bisyo sa pagkakawatan og kahayopan ... kay ako ... ako ... igo lamang mopabangon kanimo nga sa kanhiay’ng panahon ako nadakin-as!”

Ang kahugot sa penute nga gikupotan ni Oming, ingon sa nagkalugak, hangtud nga nahulog kini sa yuta ug nagginaksanay silang duha diin namulong si Kumpare niya Bartolo nga nagkanayon.

“Sukad karong adlawa Pre Oming ... magpaagas na ako sa singot ug dili na ko manghilabot pa sa mga hayop sa ubang tawo!” (Katapusan)