Anak

Reporter sa radyo si Ben og ang Cebu City Medical Center apil sa kanunay niyang bisitahan kay anha man sagad dad-on ang mga biktima sa lainlaing krimen.

Usahay daw mahisama na lang sa pinuy-anan ni Ben ang ospital kay buntag pa gani tua na siya sa tambalanan ug magbalikbalik lang hangtud hapon. Duna gani’y mga higayon nga mo-standby si Ben sa ospital sa gabii aron maoy makauna sa balita.

Ang emergency room sa ospital maoy kanunay nga bisitahan ni Ben. Kaila na niya ug nahimo na nga suod ang mga doktor ug nurse. “Ben, basin matabangan ninyo kanang babaye sa bed No. 3 kay walay ikapalit og tambal sa iyang anak,” matud sa nurse.

Gilingi ni Ben ang babaye nga gitudlo sa nurse. Hitsuraan ang maong babaye apan wala lang kaayo’y maayo nga pamiste. Nasabut ni Ben nga pobre g’yud intawon ang kahimtang sa maong babaye.

Gibiyaan ni Ben ang nurse ug giduol ang babaye nga diha maglingkod tupad sa katre nga gihigdaan sa bata. May bendahe ang agtang sa bata nga basi sa iyang nahibaw-an nahulog sa hagdan.

“Wala ka pa makapalit og tambal day?” gipangutana ni Ben ang babaye. Milingo-lingo ang babaye nga miyangad kang Ben nga nagbarug sa iyang atubangan.

“Ako pa nga gipamalihug si Mama nga mangita og kwarta kay naapikehan g’yud ko karon,” matud sa babaye sa hinay’ng sinultihan. Gikuha ni Ben ang resita og iyang nasayran nga dili kaayo daku ang kantidad nga gikinahanglan.

Naluoy si Ben nga nagsud-ong sa bata nga sa iyang tan-aw mga duha pa ka tuig ang panuigon. Maayo usab og panagway ang bata nga daw naliwat sa iyang inahan.

“Sige, ako lang usa ang mopalit niining maong mga tambal aron madapat dayon sa bata. Kun moabot na si Mama nimo, ilisi lang unya ko,” giingnan ni Ben ang babaye dayong biya paingon sa duol nga botika.

Taud-taud, mibalik si Ben sa emergency room ug gipahibalo ang nurse nga napalit na ang mga tambal. Naabtan g’yud ni Ben nga mihilak ang bata sa kasakit sa iyang samad. Naghilak usab ang inahan niini nga miam-am sa bata.

Gi-injection dayon sa nurse ang pain reliever ug gipainom sa bata ang antibiotic aron nga mapugngan ang paghubag sa samad. Taud-taud, may misulod nga hamtung babaye.

“Wala g’yud ko makahuwam og kwarta Dorin… pulos wala ‘say mga kwarta ang atong mga silingan ug ang uban wala magpahuwam,” matud sa hamtung-babaye. (Sumpayan)