Man Hater

Gula 69

Nahilom si Allan, miduko ug naghunahuna. Si Salie nagtutok sa lalaki nga ingon sa nagpalandong sa iyang gisulti. Unya, human sa daklit nga kahilom, si Allan namulong. “Unya, unsa na man tong akong giingon nimo ang bahin sa....akong gugma?” milain ang buga sa hangin ni Allan.

“Ayaw lang niana, Al,” ni Salie sa hinay nga tingog bisan misugod na pagkagot ang iyang mga ngipon. Nagpugong lang siya. Wala niya ipakita sa ulitawo nga naglagot siya sa paghisgot niini bahin sa gugma. “Mobalik ka na sab niana aron masuko na pud ko nimo? Nakalimot ka ba sa akong gibaod nimo?” Sa hunahuna pa niya: Kamaayong daklon sa ulo kining tawhana. Dili kasabot sultihan!

“Wa ko malimot niadto,” ni Allan. “Apan tinud-anay ning ako, Salie. Nganong magdumili ka man?”

“Gisultihan ko na ikaw sa hinungdan. Di ko na kini angay balikbalikon pagpasabot kanimo.”

“Lahi ako sa uban. Maantigo akong mobarog sa akong mga pulong.”

“Gikasubo ko, Allan,” hait na kaayo’g tinan-awan si Salie ngadto sa lalaki. “Hinigala lang ang akong pagtagad kanimo. Busa, ayaw na ko’g samoka.”

May landong sa kasubo, nakamatikod ang dalaga, milabhag sa panagway ni Allan dihang iya kining gitutokan. Nagpamahit kini sa mga ngabil.

“Salie, dili na lang ko magdugay,” wala madugay nananghid si Allan. Natugkad niya nga lig-on gayod ang pag-ayad ni Salie kaniya.

“Asa ka na man?” nakamatikod ang dalaga nga mora’g nangluod ang ulitawo.

“Mopauli na lang ko.” Nahisagmuyo ang ulitawo nga mibiya sa gipuy-an sa dalaga.

Sukad niadto si Allan wala na mousab pagpamisita kang Salie. Bisan sa ilang panagkuyog sa pagpanghagdaw og mga balita alang sa Moon-Star Daily, ang ulitawo wala na gayod mohisgot bisan palabtik na lang ngadto kaniya bahin sa gugma. Nahinayak tingali ang pangluod, maoy pangagpas sa dalaga. Ug kini gikalipay ni Salie kay ang tinuod nausa na ang iyang hukom sa dili pagpanarato. -- Sumpayan pa