Man Hater

Gula 68

Mainampingon siya nga mipaduol sa gate. Gihinay niya pagtukas ang puthaw nga palid sa pultahan nga agianan sa tawo. Ug nakugang siya dihang maoy nasabak sa iyang panan-aw ang bulto sa bayhon ni Allan nga nagbarog tungod sa ganghaan.

“M-maayong gabii,” nabakikaw ug nag-ukon-ukon ang ulitawo sa iyang atubangan.

“Maayong gabii sab,” gitutokan niya si Allan.

“Um. M-mahimo bang...”

“Dali,” daling salo sa dalaga nga nakasabot nga si Allan gustong modayon.

Gipalingkod ni Salie ang ulitawong potograpo sa sopa simpig sa bentana. Ang dalaga milingkod sa atbang niini.

Mihugpa sa daklit ang kahilom. Wala sila’y timik nga nag-atubang sa pagpanglingkod. Ingon sa naghulat ang usa’g-usa kanila kun kinsay mouna sa pagsulti.

“Nahasuroy ka man?” gigisi ni Salie ang kahilom nga mihabol kanila. Nahibulong siya sa paghitungha sa ulitawo sa iyang gipuy-an nga gabii na. Ang taknaan nga nagbitay nagtug-an nga alas siyete na.

“Mianhi ko kay nahibulong ko,” matud ni Allan. “Wa ka didto sa buhatan sa akong pag-abot kaganinang buntag. Matud ni Vilma miadto ka kuno sa police headquarters. Miagpas ko nimo apan wala ka gihapon didto. Wala sab didto si Inspector Cuyos. Nagkuyog ba kamo?”

Nasud-ipan ang dalaga. Apan kadali ra siyang nakabunlot ug katarongan. “Wa mi magkuyog. Nagdungan lang mi’g gawas sa iyang buhatan apan nag-iyahay kami’g sakay pag-abot sa gawas. Misakay siya sa iyang awto ug ambot diin paingon,” gibabakan niya ang ulitawo.

Mitutok si Allan kaniya. Ingon sa gitugkad niini kun nagsulti ba siya sa tinuod. “Ikaw, diin ka man usab paingon?”

“Mipauli ko dinhi,” gibakakan pag-usab ni Salie ang lalaki. Sa hilom mibati na siya’g kalagot sa pagsukitsukit niini kaniya apan iya lamang gipugngan. “Medyo naglain ang akong lawas kaganina maong mipahuway. Karon okey na ang paminaw ko. -- Sumpayan pa