Demolisyon

Gula 4

Wala makasabot si Andro sa iyang gibati nga nakakita nga gibisitahan si Nikki sa iyang hinigugma.

Kahilakon siya nga naghuna-huna. Wala gayud siya duawa og duka mao nga mitindog si Andro ug nagpaso-paso sa sala. Nasayud siya nga natulog na ang iyang inahan kay mingaw ug pawong na ang suga sa iyang kwarto.

Gidung-awan niya ang silong nga bahin nga nahimutangan sa lingkoranan nga gilingkoran nila kaganina ni Nikki, diin didto mibanos og lingkod si Nikki ug ang iyang boyfriend. Si Nikki na lang ang naglingkod.

Nanghupaw si Andro nga nagsud-ong sa dalaga sa ubos. Taud-taud nakita ni Andro nga mihangad si Nikki sa taas. Nakahukom si Andro nga kanaugon niya ang dalaga. Nabantayan ni Nikki ang iyang pagkanaug ug nakita niya nga mipahiyom ang dalaga.

"Nawala ka man lang pagkalit Andro. Ipaila-ila unta tika sa akong boyfriend," ni Nikki pa nga nagpahiyom. Masulob-on gihapon ang dagway sa ulitawo. "Naunsa ka man nga mikalit ka man lang nga nagluya?" matud sa dalaga.

Milingkod si Andro tupad ni Nikki. Halos walay pulong nga mogawas sa iyang baba. "Naunsa ka uy?" giyugyog ni Nikki ang iyang abaga. "Wala man Nikki. Ambot wala ko makasabot sa akong gibati dihang nakita nako nga dunay lalaki nga miabot ug nasabtan nako nga imo siyang boyfriend," pasabot ni Andro.

Gitug-anan ni Nikki si Andro nga nagkalalis sila ug ang iyang boyfriend. "Nangayo ko niya og tabang ganina dihang giguba sa SPEED ang among balay apan wala g'yud siya mitunga. Didto diay sila sa Talisay nangaligo uban sa iyang mga higala," saysay ni Nikki.

"Wala ka ba gutoma Nikki? Tana, mag-snack ta dapit sa Mabolo kay duna may 24 hours nga fast food store diha," giingnan ni Andro si Nikki. "Sigi pero mananghid usa ko ni Mama kay basin mangita unya," sa dalaga pa.

Giandam ni Andro ang iyang motorsiklo. Taud-taud, migawas si Nikki ug miduol kaniya. "Adto na ta Andro?" matud sa dalaga nga nagsul-ob na lang og short pants. Miangkas dayon si Nikki sa motorsiklo dihang nakasakay na si Andro.

Inanay'ng nahuwasan si Andro sa gibati niya nga kasubo kaganina. Gipulihan na karon sa kalipay ang iyang gibati nga kasub-anan. Nanulod sila sa usa ka fast food sa eskena sa Mabolo. "Saulogon nato ang atong panagkaila karong adlawa Nikki. Bangkahan tika," giingnan ni Andro ang dalaga. (Sumpayan)