Nangabit

Dear Tita Salie,

Maayong adlaw. Tawga lang ko og RG, 26 years of age, usa ka minyo ug dunay 1 ka anak. Taga Negros ko apan karon nia na ako nagpuyo dinhi sa Cebu kay taga dinhi man akong asawa.

Ang akong problema mahitungod sa akong asawa. Nagtrabaho siya isip usa ka saleslady. Nalipay na unta ko kay dunay income ang akong partner maayo na lang kay duna koy kaabag sa mga gastohan sa among balay kay pait man kaayo karong panahona kun usa lang ang mangita og kuwarta.

Ang wala nako damha nga nakauyab man hinuon og lain ang akong pinalanggang asawa. Sakit kaayo nakong hunahunaon kay sobra ang akong pagsalig ngadto kaniya, apan iyang giguba ang tanan. Nahugno gyud ko sa akong nahibaw-an. Nagbinuotan man unta ko sa akong pagkabana ug naningkamot ko nga malipayon siya sa among pagpuyo.

Dili gyud ko katuo nga iya kining mabuhat nga magluib kanako kay buotan man kini siya nga babaye. Nakahunahuna ko nga makigbulag na lang niya, Tita, apan mora’g dili man nako makaya ang kasakit kun mawala siya kanako. Maluoy usab ako sa akong anak nga magdako nga dili kompleto ang iyang mga ginikanan. Unsa may akong buhaton karon, Tita? -- RG

* * *

RG, pasayloa lang ang imong asawa nga napukan ang kahuyang. Wala niya makayang panalipdan ang inyong gipanumpaan diha sa altar sa kaminyoon. Iya seguro nga nakalimtan ang iyang saad nga ikaw ra gyud ang iyang higugmaon. Pasayloa siya ug dawata ang iyang kahuyang. Ug sa imong pagpasaylo kaniya hatagi siya og laing higayon aron iyang ayohon ang iyang giguba nga pagsalig nga imong gihatag ngadto kaniya.

Pakigsultihi siya sa pinahinay nga paagi aron maminaw siya. Ayaw pag-inisog aron makasabot siya ug humok ang iyang kasingkasing nga modawat sa imong isulti kaniya. Imong ipahinumdom kaniya ang inyong mga plano sa kinabuhi. Ug labi pang gikinahanglan nga inyong palawman ang inyong gugma kay aduna na kamoy anak nga maoy labaw’ng malipay o kaha maguol kun iyang makita kaninyo nga wala nay gugma o dili na loving sa usa’g-usa. Hunahunaa nga dako nang kalipay sa bata kun iyang makita ang iyang mga ginikanan nga puno sa gugma.

Walay problema nga dili masulbad kun ang usa’g-usa andam pang maminaw ug motabang nga masulbad ang problema. -- Tita Salie