Mata sa Kasingkasing

Gula 69

“Dili daotan para nimo. Pero para nako, di maayong makigsuod ka kaniya. Ikaw mismo nasayod nga dili siya maayo’g reputasyon sa atong tulonghaan. Busa dili ko gustong makigsuod ka kaniya.”

Nakalitan si Angeline sa gisulti ni Erik. Sa gipadayag niini kaniya, ingon sa dako kini’g katungod sa iyang kinabuhi.

“Ngano bang manghilabot ka man sa akong kinabuhi?” May kalagot nga miubay sa sinultihan ni Angeline. “Nganong magbuot ka man kun unsay akong buhaton? Unsa bay labot mo sa akong kinabuhi?”

“Managhigala kita, Angeline,” nagkanayon si Erik. “Ug isip nagpakabana mong higala, dili ko gustong makigsuod ka sa tawong way hinungdan sama kang Robert.”

“Gusto lang kong makatabang niya, Erik, aron magtarong na siya sa iyang pagtuon. Maong wa ko mobalibad sa gamay’ng pabor nga iyang gipangayo nako para sa ilang midterm exam.”

“Ingon ba diay niana ka mahinungdanon si Robert alang kanimo, Angeline?”

“Unsay buot mong ipasabot nianang pagkasultiha?” -- Sumpayan pa