Demolisyon

Gula 3

Mapasalamaton kaayo si Nikki kang Andro nga gitabangan siya nga makakita og kapuy-an human gidemolis sa SPEED ang ilang gamay’ng balay daplin sa karsada sa North Reclamation Area.

“Walay problema Nikki, nalooy man gud ko nagtan-aw nimo ganina nga nagbakho samtang nagtan-aw sa inyong balay nga giguba sa mga sakop sa demolition team,” ni Andro pa nga mitutok sa dalaga.

Taud-taud, miabot ang trak de karga nga gikargahan sa kagamitan nila ni Nikki. Si Andro ang mibayad sa abang sa trak. “Kaikog baya nako nimo Dong uy nga ikaw pa g’yud ang mibayad sa trak,” matud sa inahan ni Nikki.

Mitabang si Andro sa pagpahimutang sa kagamitan nila ni Nikki sulod sa silong sa ilang balay. Sanglit daku-daku man ang lugar sa silong ug hitsas kini sa tubig ug kuryente, harohay ang pagkabutang nila ni Nikki.

Tagsa sila og kwarto si Nikki ug ang iyang inahan. Tibook adlaw nga wala g’yud mobuwag si Andro kang Nikki. Dihay mga higayon nga nabantayan niya nga si Nikki dunay ikaestorya sa selpon nga manawag kaniya.

Pagka gabii, nagsultihanay sila si Nikki didto sa lingkoranan nga gipahimutang atubangan sa pultahan. “Pwede ka ba nga ma-invite nako nga manuroy pipila ka adlaw gikan karon Nikki?”

“Sure... no problem,” matud ni Nikki. Dunay mihunong nga motor atubangan sa balay. Nanaug ang sakay niini ug gisugat kini sa dalaga.

“Diin ka man ganina? Giguba ang among balay ug magpatabang unta ko nimo apan wala ka g’yud motubag,” giingnan ni Nikki ang lalaki. Naniid si Andro ug nasabot niya nga may relasyon si Nikki sa maong lalaki.

Hinay-hinay nga mibati og kasina si Andro nga nagsultihanay si Nikki sa maong lalaki. Mitindog siya ug mihinay sa pagsaka sa taas sa balay diin tua sila nagpuyo ug ang iyang inahan.

Gikan sa taas, gilili niya sa ubos ug nakita niya nga napalingi-lingi si Nikki. Mora’g dunay gipangita. Nagtoo si Andro nga siya ang gipangita ni Nikki. Hilom siya nga naniid gikan sa taas pinaagi sa pagpalapos sa iyang panan-aw sa berha sa bentana.

Daw naluya si Andro nga nagtan-aw kanila ni Nikki ug sa lalaki nga naglingkud sa lingkoranan. Wala siya makaantos nga nagtan-aw, misulod na lang siya sa kwarto aron matulog. (Sumpayan)