Naay sakit

Dear Tita Salie,

Have a wonderful day. Usa ko sa mga tigbasa sa imong column ang Pasabta. Malingaw gyod ko nimo kay maayo kaayo ka modala og tambag. Busa naganahan usab ako nga magpadala kanimo niining akong suliran. Maayo unta kun imo pod kong matabangan sa akong problema.

Ako diay si Caren usa ka single mom usa ka minyo ang amahan sa akong anak. Taudtaod na gyod ang among relasyon kay 4 years na man ang akong baby. Duna sab koy kapuyo karon, apan wala siya masayod nga sige pa mi sa amahan sa akong anak. Maglisod man god ko pagbiya niining minyo tungod kay love gyod kaayo nako siya. Ug wala gyod koy gugma niining akong kapuyo karon igo lang ko nga naluoy niya.

Nagsige ra ba og text nako ang asawa sa akong uyab nga minyo. Ug ako ra pod siyang tubayan sa pag-text. Akong nasayran nga masakiton ang asawa ug naluoy ko niya. Mao nga usahay makahunahuna ko nga ako nalang buhian ang iyang bana. Pero sakitan man god ko nga maghunahuna nga wala na siya nako kay siya man gyod ang tinuod kong gihigugma ug wala man gyod koy gugma niining akong kapuyo. Mao kini ang kanunay nga nihasol kanako, Tita. Palihog pasabta ko ug tabangi ko kun unsay akong buhaton. Daghang salamat and more power. -- Caren

* * *

Heloo, Caren! Bisan pa man kun aduna kay anak sa imong uyab, bisan paman kun mahal kaayo nimo kining lalakiha apan mogawas man ang kamatuoran nga dili siya imoha, tungod aduna siya’y pamilya. Aduna gyoy babaye ug asawa nga tinuod nga nanag-iya kaniya. Busa bisan sakit sa imong balatian hinay-hinaya og langkat kining tawhana diha sa imong kasingkasing aron duna kay peace of mind ug limpyo nga konsensya.

Sakto ang imong nahunahunaan nga imo na lang siya nga buhian aron usab siya maka-focus na pag-ayo sa iyang pamilya ug iyang maatiman ang iyang masakiton nga asawa. Dako kining kalipay alang sa iyang pamilya kun inyo nang undangon ang inyong relasyon. Nakaseguro ko nga monindot na usab ang ilang pagpuyo kay dili na man unya divided ang hunahuna sa imong uyab kay mausa na lang kini ngadto sa iyang pamilya.

Pinaagi sa imong pagpakigbulag sa imong uyab motubo usab ang imong gugma nganha sa imong ka-live in karon. Kanang kaluoy nga imong gibati ma-develop kana ug mamahimong gugma ug monindot na unya pag-ayo ang inyong pagpuyo tungod kay imo namang gihatag kaniya ang tanan nimong attention tungod kay wala na man ang lalaki nga natingban sa tanan nimong pagmahal. Kun mahitabo na kini nga mausa na ang imong hunahuna puyde na kamong magplano sa inyong kasal aron gyod legal ug pinahimutang ang inyong pagpuyo. -- Tita Salie