Man hater

“Tinuod kana, Yuri,” matud ni Salie. “Mao tingali nga lakip ang iyang tingog iyang giusab.”

“Nakaigo ka nianang puntuha,” matud ni Yuri. “Ug tungod niini puyde na kitang magduda.”

“Nga unsa, Yuri?” ni Salie.

“Nga ang mamumuno usa ka tawong ilado.”

“Usa ka adunahan o politiko, mao bay buot mong ipasabot nianang pagkasultiha?”

Milingolingo si Yuri. “Dili lang sila maoy mga inila, Salie. Naay daghang sikat ug tunog kaayo ang mga ngalan.”

“Sama pananglit sa unsa?”

“Sama sa mga radio and TV personalities. Sa mga taga press sama kaninyo. Di ba mga ilado man kamo?”

“Nagduda ka ba nga malagmit taga media o press ang kriminal?”

“Ako lang kining premise tungod sa pag-usab niya sa iyang tingog. Posible nga iya kadtong gihimo kay sinati sa kadaghanan ang iyang tingog ug dali ra unya siyang mailhan.”

Wala motingog si Salie. Gitugkad niya ang gisulti sa polis. Unya may laing pangutana nga iyang gipasupot. “Nagduda ka ba nako, Yuri?”

Mikatawa ang ulitawo. Apan wala siya magdahom nga kadto’y ipangutana sa dalaga. “Kadudahan ba gud ka?”

“Sumala gud sa imong tan-aw?”

“Yuna,” miligdong ang nawong sa ulitawo nga mitutok kang Salie. “Ngano bang nakapangutana ka man niana?”

“Miingon ka man gud kaganina nga posibleng lalaki ug posible usab nga babaye ang kriminal,” ni Salie. Ug natahap ka pa gayod nga taga press o media ang maong kriminal.”

Mikatawa og hilaw si Yuri. “Ang tanan puydeng kadudahan samtang dili pa masikop ang mamumuno, Salie. Apan wa ko’y pagduda nimo. Honest. Layo ra kana sa tinuod. -- Sumpayan pa