Matag tilagak sa laway ni Flordelis

Dinhi sa balangay sa Sandayong si Flordelis lang ang matawag nga dunay nindot kaayong korte sa iyang mga ngabil. Kun ang usa ka lalaki o ulitawo nga makakita sa mga ngabil ni Flordelis dili gyud mahitabo nga dili kini bation og kaibog ug ang mosantop dayon sa hunahuna mao nga gusto niya kining angkonon.

Guwapa usab kini si Flordelis. Anak siya sa magtiayong Benigna-Santos nga mga mag-uuma lang didto sa may bukiran sa Magsapa. Dinhi sa ilang balangay daghan nang mga ulitawo nga buot mopadayag sa ilang pagbati ug ang uban gani mamisita sa dalaga apan ang nakapait kay dili gyud moatubang kanila.

Gani, magbalikbalik na lang ang mga teen-agers o mga bag-ong tubo sa balay nilang Flordelis apan pakyas sila kay dili gyud kini moatubang kanila. Dili man matawag nga manggiulawon ang dalaga apan dili gyud kini moatubang kutob sa mga lalaki nga moatubang o mamisita kaniya.

Unya ang magtiayong Benigna-Santos may namatikdan sa ilang anak dalaga nga mokalit lang kini’g kabigsa o kaluhagan kun motilagak na ang lawas niini. Manaog dayon kini sa silong ug unya magsuroysuroy sa mga kasilinganan. Ug kutob sa iyang matagboan nga mga lalaki makighinabi gyud siya niini nga mora’g iyang danihon.

Ug ang usa ka lalaki nga makakita sa mga ngabil sa dalaga nga umog sa laway magpanglad-ok labi na gyud nga nindot kaayo ang porma sa iyang mga ngabil. Usa sa naibog pag-ayo ni Flordelis mao si Sancho, ang anak sa mayor sa ilang lungsod. Guwapo usab kini si Sancho apan hilabihan ka palikiro kay daghan na kini’g gipamaangkan dinhi sa ilang lungsod.

Dagha’g bodyguard si Sancho sa higayon nga moadto siya sa ilang Flordelis. Ug ang iyang karibal mao si Tonying nga anak sa tighimog silyang tuwangtuwang dinhi sa ilang baryo. Gusto na untang patyon ni Sancho si Tonying dihang nagkaabot sila didto sa balay nilang Flordelis pinaagi sa dala niining pistola nga kalibre .45 apan gisanta siya sa dalaga ug nasuko kini nga nagkanayon, “Sancho, di ko gusto mobalik ka pa dinhi sa amo kun ingon diay ka ana nga mopatay ka mag tawo.”

“Oo, patyon ko ang kutob sa moilog kanimo gikan nako,” isog nga namulong si Sancho. “Ako ka lang, Flordelis...ako ka lang...”

“Si Tonying ang akong gihigugma ug dili ikaw,” mitaas ang tingog sa dalaga.

Nakatutok si Tonying sa dalaga ug nagkasugat ang ilang mga tinan-awan. Unya may gisulti si Flordelis ug samtang siya nagsulti misugod na pagtilagak ang iyang laway nga mibasa pag-ayo sa iyang mga ngabil, niya pa: “Sige, gusto ko nga kinsa kaninyo ang makahurot sa akong laway, maoy akong higugmaon hangtod sa hangtod...”

Tuod, maoy miuna si Sancho paghawok kang Flordelis apan mikulima siya kay gipaitan sa laway sa dalaga. “Puweeeee!!, a, kapaitttt! sa imong laway, ug nakadigwa kini.

Dayon misunod si Tonying paghawok sa mga ngabil ni Flordelis ug ingon sa giganahan si Tonying ug midangat kapin sa duha ka oras ang ilang paghinagkanay. Unya dihang mitikyop na ang kilomkilom kalit lang nga nausab si Flordelis, mahimo siyang mangtas nga ungo. “Grrrrrr! Tonyinggg, mahimo ka na unya usab nga mangtas nga parehas nako, he, he, he...ug kini si Sancho maoy atong suyopan sa iyang dugooo...”

Matag gabii dinhi sa balangay sa Sandayong kanunay nang dunay madungog ang mga lumolupyo og tingog sa wakwak ug duna na say daghang nabalbal ang maong mga wakwak nga sila si Tonying ug Flordelis nga mga kaliwat diay og mga ungo, kay ang ilang mga apohan maoy mga mangtas nga ungo kaniadto didto sa Isla Bungot-Itom. (Kataposan)