Man Hater

Gula 62

“Unsay buot nimong ingnon niana, Yuri?” sukot ni Salie.

“Posibleng usa ka lalaki ug posible usab nga usa ka babaye ang mamumuno!”

“Ha?”

“Miingon si Vicky-- ang higala sa biktima nga nakakita sa suspect nga nagsakay og abohon nga Nissan Altima 2.0- nga tag-as kini’g buhok nga gibanganan og lastiko. Talagsa ra kining mosulti ug mora’g dili natural ang tingog.”

“Dili natural ang tingog?” nakasuna ang dalaga nga wala makatugkad sa kataposang gipamulong sa alagad sa balaod.

“Oo,” ni Yuri pa. “Mora’g dunay gibutang sa baba aron dili makagawas ang natural niyang tingog.”

Wala makatingog si Salie. Midasmag ang usa ka day-o nga pagbati sa iyang kaugalingon sa iyang nadungog. Daklit nga nahinumdoman sa dalaga kadtong sakyanan nga iyang nakitang nag-urong tungod sa gate sa iyang gipuy-an -- gabii kadto nga kapin na sa usa ka bulan ang milabay. Usa kadto ka Nissan Altima 2.0 ug mora’g siya’y gipanid-an sa nagsakay niini. Midali gani kini’g pahilayo pagkamatikod nga diha siya sa bentana.

Nahinumdom usab si Salie nga ang tingog sa misteryosong tawo nga nanawag kaniya sa telepono dili kasarangan. Mora’g pinugngan!

Apan dili mahitabo nga ang nagsakay niadtong sakyanan nga iyang nakita mao ang misteryosong tawo. Dili kini tag-as og buhok sahi sa gihulagway ni Yuri kaniya sa nagkuha kang Debbie Balatan niadtong gabii nga kini gipatay. Gawas pa, dili usa lang ka tawo ang nakapanag-iya og awto nga Nissan Altima 2.0.

“Pero pagkadaghan sa Nissan Altima nga mga sakyanan dinhi sa siyudad karon, Yuri?”

“Mao bitaw. Bisan pa niini, aduna na akoy order sa akong mga sakop nga kun magabii maoy ilang panid-an ang Nissan Altima nga sama sa gihubit ni Vicky.”

Nahilom si Salie.

“Mat-an lang gyud ang maong kriminal,” matud na usab ni Yuri. Ingon sa nagmatngon gayod kini’g maayo nga dili mailhan.”-- Sumpayan pa