Sa text lang

Miyerkules sa buntag Enero 5, 2011. Mao pa lang gayoy pagpamasibas sa haring adlaw sa sidlakan. Naglingkod si Ricky atubang sa lingin nga talad nga gituyo pagpahimutang ilawom sa punoan sa Magtalisay nga anaa atbang sa ilang balay.

Ulitawo pa si Ricky sa edad nga 40 ug bugtong siyang anak. Nataligam-an niya ang kaminyoon kay nagapos siya sa pagsuportar sa mga tigulang na niyang mga ginikanan nga dili pa lang gani dugay nga mitaliwan. Nagsunod lang kadto sila sa pagpangamatay.

Sa dakong sungog sa kapalaran ug sa iyang pagbangotan, masulub-on siyang nag-inusara niining balay nga gitalikdan sa iyang mga ginikanan. Ug karong buntaga nagkalingaw siya pagdimdim sa mainit nga kape unya nuntan niya pagyupyop sa sigarilyo. Samtang diha siya sa maong kahimtang, mikiring ang iyang selpon nga diha sa talad. Dali niya kining gipunit ug gitapion sa iyang dalunggan dungan sa pag-ingon: “Hello!”

“Hello, kumosta ka?” gikan sa pikas linya.

“Okay lang, kinsa man ni?” sukot ni Ricky.

“Si Olga, taga Iloilo,” tubag sa babaye.

“Giunsa man nimo pagkahibawo sa akong numero?” sukot ni Ricky.

“Si Regine ang naghatag sa imong numero.”

“Kinsang, Regine?” gihakop si Ricky sa dakong katingala. Naghunahuna. Wala siya’y kaila nga Regine.

“Announcer siya sa radyo, FM station diri sa Iloilo. Nangayo ko niya og textmate ug kining numeroha maoy iyang gihatag nako,” tug-an ni Olga.

“Mao ba?” naiknat ang kilay ni Ricky. “Yuna, ako diay si Ricky, single.”

“Ricky? Artistahon mang ngalana. Pila nay imong edad, Ricky?” paraygon kaayo ang tingog sa babaye.

“40 na,” ni Ricky, “matud pa, life begins at 40. Ikaw?”

“28 na, dalaga ug nagtrabaho sa usa ka lending firm diri sa Iloilo.”

“Okay ka lang sa ako Olga?” ni Ricky.

“Okay lang,” mubong tubag ni Olga.

Ug naputol ang ilang panagsulti. Apan gisundan kini sa nagpusot-pusot nga mga text. Walay adlaw nga dili manawag si Olga kang Ricky. Ug kini dili man gani kini manawag, mo text kini kaniya.

Usa ka adlaw niana, gisulayan ni Ricky sa pagpanguyab si Olga pinaagi sa text. Nagsinukliay sila sa mga pulong sa gugma hangtod nga nagkasinabtanay sila sa text lang.

Nagpadayon ang ilang komunikasyon pinaagi sa mga text messages. Nagkainit ug nag-anam paglipang sa ilang dughan ang gugma nga gisugdan usa ka buntag niana samtang naglingkod si Ricky atubang sa lingin nga talad ilawom sa Magtalisay. Si Regine? O, si Regine, nga matud pa ni Olga, DJ sa usa ka FM radio station sa Iloilo City maoy naghimong tulay aron magkatakdo ang ilang mga dalan.

Tungod sa awhag sa tawhanong pagbati, andam na si Ricky sa iyang panaw paingon sa Iloilo City. Nag-text si Olga nga sugaton siya niini sa pantalan sa Iloilo. Gihulagway ni Olga ang iyang kaugalingon aron paghatag sa kasayon ni Ricky sa pag-ila kaniya. Nagsul-ob siya og blouse nga pula, giparesan og short nga puti. Gihulagway usab ni Ricky ang iyang kaugalingon.

Kulba hinam ang mga yugto sa ilang panagkita. Mora’g alimpungat lang sa nagduhiraw nga hunahuna, apan dili malalis ang gihikyad nga kamatuoran nga pinaagi sa text lang nakab-ot nila ang katumanan. (Katapusan)