Mata sa Kasingkasing

Gula 64

“Unsay gusto mong orderon?” Nangutana si Robert dihang nakalingkod na sila atubangan sa usa ka lamesa nga bag-o lang gibiyaan sa duha ka kostumer nga nanggawas.

“Busog ko,” mibalibad si Angeline. “Salamat na lang.”

Apan wala motuo si Robert niya. Mi-order gayod kini’g cake ug lemon juice alang nilang duha. Ug samtang nangaon sila, gipadayag ni Robert ang iyang tuyo ngadto kang Angeline.

“Bahin sa among PE subject, ba,” nagkanayon si Robert. “Pasayawon mi ni Mrs. Blangigel para sa among midterm. Nagkinahanglan ko’g partner sa sayaw. Ug ikaw ang akong nahuna-hunaan.”

“U-unsa?” Nakugang si Angeline.

“Ayaw ko’g balibari, Angeline. Please...”

“Pero nganong ako man gyud? Kadaghan sa mga babaye diha nga maayong mosayaw. Nganong ako pa man gyud?”

“Tungod kay espesyal ka para nako, Angeline.”

Wala motingog si Angeline. Miduko siya sa atubangan ni Robert. -- Sumpayan pa