Anak sa 'Ungo'

Gula 4

“Sige, pag-ayo-ayo gaw ug pagbantay g’yud tawon nga dili ka mabiktima sa mga ungo,” giingnan si Kenn sa duha niya ka ig-agaw sa dayon na niyang lakaw paingon sa balay nila ni Tina, nga anak ni Mano Valentin.

Hayag kaayo ang flashlight ni Kenn nga maoy gigamit niya sa pagbanwag sa gamay’ng dalan-dalan nga naglugsong paingon sa pikas bungtod. Apan kalit lang nahaigking si Kenn kay may daku ug itum nga iro nga milabang sa iyang agianan.

Nagkuba-kuba ang dughan ni Kenn ug gigunitan niya ang iyang pistola, apan mipadayon siya sa paglakaw. Paspas ang paglakaw ni Kenn ug nagkaduol na siya sa balay ni Mano Valentin.

Apan kalit na usab siya nga nahaigking ug napaatras. “Wak! Wak! Wak!” nadungog ni Kenn nga may nag-wakwak ibabaw sa kahoy nga gitugdonan niadtong itum nga langgam kaganina nga iyang napusilan.

Napugos si Kenn pagdagan paingon sa balay nila ni Tina. Giabot na siya og gamay’ng pagtuo nga tinuod nga ungo ang pamilya ni Mano Valentin, apan gipadayon niya ang iyang tinguha.

“Nong Val! Tina! Tinnn!” naghangos si Kenn nga nagpanawag sa ngalan sa amahan ug anak. Miabli ang pultahan sa balay ug gisugat siya ni Valentin ug Tina nga gwapa kaayo sa iyang gisul-ob.

Dunay guwangon nga babaye nga migawas gikan sa kwarto. Gipaila-ila ni Tina ang iyang inahan ngadto kang Kenn. Nagpahiyom si Valentin. “Nganong naghangos ka Dong? Nakadungog ka nga dunay nagwakwak?”

Mitangdo si Kenn. “Ingon ka Nong Val nga wala’y wakwak dinhi pero nganong nakadungog man g’yud ko nga may nagwakwak sa kahoy... unya didto sa unahan dunay daku ug itum kaayong iro nga milabang sa akong agianan?”

 Igo lang mikatawa si Valentin. “Sige, mamisita ka man kaha sa among anak, didto kamo pag-estorya sa kayda maayo kay karong taud-taud mosubang na ang buwan.”

Naniid si Kenn sa palibot. Didto siya milingkud sa lingkoranan nga nag-atubang sa dakung punoan sa kahoy. “Nganong mianhi ka man sa among pinobre nga balay Kenn? Wala ka ba g’yud mahadlok nga gidungog mi nga ungo,” matud ni Tina.

Wala dayon motubag si Kenn. Dayon gitutokan niya si Tina. “Nabihag ko sa imong kaanyag Tin ug wala nako tuyoa nga mibati’g gugma nimo. I love you Tina.”

“Mituo ko nga wala ka magbinuang Kenn kay dili basta-basta nga moanhi ang usa ka lalaki dinhi nga gidungog na nga banay sa mga ungo ug nga adunay ungo kun wala pa siya’y tinuod nga katuyoan,” ni Tina pa. (Sumpayan)