Gula 3
"Mobalik ka unyang gabii Dong?" nahingangha si Mano Valentin pagkadungog ni Kenn nga nananghid nga mobalik siya inig-kagabii.
Gisubli ni Kenn pagpananghid nga gusto siya nga mobalik inig-kagabii. "Gusto ko nga makighigala ni Tina, Nong Valentin mao nga gusto ko nga mobalik unya."
Mipahiyom si Mano Valentin nga naminaw ni Kenn. “Wa ka ba mahadlok nga mobalik dinhi nga gidungog man kami nga ungo?”
"Di ko mahadlok Nong Valentin kay mitoo ko sa imong gisulti kaganina nga dili tinuod ang tabi-tabi nga kamo mga ungo," ni Kenn pa.
Giingnan si Kenn sa amahan ni Tina nga way problema kun mobalik siya sa ilang balay inig-kagabii.
Nananghid si Kenn kang Tina nga molakaw na ug nakita sa ulitawo nga mibathay sa panagway sa dalaga ang kaandam pag-abi-abi kaniya.
"Gaw pastilan, nganong miadto ka man sa balay sa mga ungo? Kuyawan mi kun matakdan ka nila gaw... Basin unya og usa ka na ka ungo inigbalik sa siyudad," matud sa ig-agaw ni Kenn nga si Julian.
Igo lang mipahiyom si Kenn. "Bi unsa may rason nga gidudahan man ninyo nga mga ungo ang pamilya ni Mano Valentin ug ilabi na si Tina?" gisukna ni Kenn ang duha niya ka ig-agaw.
Hapit magkadungan og tubag ang duha ka ig-agaw ni Kenn. "Panahon sa gabii gaw, magtubag-tubag ang wakwak diha sa labong nga kahoy duol sa balay sa tiguwang," ni Julian pa.
Mibahakhak pagkatawa si Kenn samtang nahibulong kaayo ang duha niya ka ig-agaw nganong mikatawa siya pag-ayo. "Unyang gabii gaw, masuwayan nato kun tinuod ba nga dunay wakwak diha. Mangadto ta 'ng tulo gaw," matud ni Kenn.
Apan abtik kaayong nakabalibad ang duha ka ig-agaw ni Kenn. "Dili g'yud hinoon mi moadto gaw Kenn. Kabuang namo no tabla ra nga gilawog nato ang atong kaugalingon sa mga ungo."
Wala na sila modayon sa pagpangayam. Namalik sila sa balay nila ni Julian. Dayon mitikyop ang kilom-kilom ug sayo nga nanihapon ang mag-agaw. "Tambag namo nimo gaw Kenn ayaw tawon pagdayon sa imong plano nga mamisita sa anak sa ungo," ni Julian pa.
"Dili ko mahadlok mga agaw. Akong ipakita ninyo nga ang taga siyudad dili motoo og ungo," matud ni Kenn nga nangandam na sa iyang gamit. Wala niya itug-an sa iyang mga ig-agaw nga duna siya'y kalibre .45 nga pistola. (Sumpayan)