Deb, naa unta ko’y isulti nimo?” nako pa samtang naglakaw ming duha daplin sa karsada karong alas diyes sa gabii gikan sa gitambongan namo nga Valentine’s Party. Nikuba dayon akong dughan kay kining akong gisulti maoy pagsugod sa akong pagpangamoral ni Debra.
Dugay ko na ning gimemorya akong igsusulti. Tinudlo ni Noy Tonio suod nga higala ni papa Dencio nga mao say nagtudlo nako sa pagpangahas og gitara. Niurong ko paglakaw. Kaguniton ko sa kamot ni Debra. Apan wa lang una nako buhata kay niumog akong palad sa kanerbiyos. Niurong sab si Debra paglakaw. Nilingi nako. Nisamot paggilaw iyang kaanyag sa akong pagtan-aw nga nadan-agan sa sugang dagitabnon gikan sa poste sa eskina iyang nawong.
Niurong ko’g lakaw kay kun mopadayon pa ko moabot na mi sa tugkaran sa ilang balay ni Debra nga naa ra daplin sa Juana Osmeña Extension, sa sitio Kintolimbo.
Niurong mi ug nagbarog sa may eskina sa dalang lugsongon padulong sa Gochan Hills.
“Unsa ba nang isulti nimo? Rud? Nga dugay tang nag-uban sa party sa balay sa atong kaklase nga si Henrieta, wa ka mosulti!” ni Debra nga daw may pagmahay ang tono.
“Nasayod na ba kaha siya’g unsay akong isulti?” nakapangutana ko’s akong kaugalingon sa hunahuna lang.
Nakapanglab-ok ko’g laway. Unya may pipila ka lusok singot namutho sa akong agtang.
Silingan ug kaklase mi ni Debra sa fourth year high school. Apan sukad sa first year pa ko, dugay na kong may pagbati niya. Di lang kaingon. Kay kulhanon lagi. Ug siya ra sab ang babayeng akong naibgan. Wa gyud ko kasuway og pangulitawo og laing babaye. Disesete anyos pa man ko. Pareho mi’g pangidaron ni Debra. Nakakita man ko sa iyang Birth Certificate sa pagsumiter namo ngadto sa among teacher-in-charge, preparasyon paras among diploma.
Aron kanunay kong mahiduol niya, magpasangil lang ko’g panghuwam niya’g libro. Usahay patudlo kunohay ko sa mga homework ug assignments. Wa man lang siya’y malisya. Kay ako man say sugoon sa iyang mama Lina kun molayas iyang manghod nga lalaki nga badlongon. Ini’g layas adtong Ding, kay kun makasala, molayas man, mahadlok sa bunal o kastigo, ako dayo’y papangitaon kun haing balaya nipuyo. Ako’y moam-am sa pagpauli, unya pasaligan nga di siya kastigohon. Nasuod na sab ko’s iyang mama nga gagmay pa silang mga anak, nabiyuda na. Grabe sab gyud mamunal iyang mama. Kun mahinayak, binugha gyu’y ibunal.
“Di ba kaha ka masuko, Deb? Kun isulti ko ni nimo?” nako pa nga nikanga.
“Kun ngil-ad imong isulti, natural masuko ko! Pero di man kaha na dautan” ni Debra nga mora’g gahinamhinam.
Kasultihon na gyud kaayo ko. Unya nisamot hinuon og kuba akong dughan. Nagsigi nag rambol sa akong utok kun unsa gyu’y akong isulti.
“Gihigugma ko ikaw! Nahigugma ko nimo! Naibog ko nimo. In love ko nimo. Type kita. In love ko nimo. Type kita. I love you.” Naglibog na lang hinoon ko’g pili unsay akong isulti. Hilasan man ko molitok sa atong pinulongan gyud. Mora’g sa drama ra man nas radio malitok.
“I love you, Deb. Will you be my Valentine?” nako pa dayong gunit sa iyang walang kamot.
“Kabasa ba nimo’g kamot. Unya medyo nagkurog pa gyud!” ni Debra nga nagbagulbol.
“Pasensiya ka na. This is the first time that I courted a woman!” nangurso kong namulong
“Unya Deb? Uyab na ta?” dugang nako.
“Karong adlaw Valentine’s Day. Nagkuyog ta’s Valentine’s Party. Daghang lalaki ni-invite nako sa ubang mga Valentine’s Party. Ikaw ra gyud akong gikuyogan. Unsa pa man diay na?” ni Debra nga daw nangasaba.
“Sorry, wa dayon ko ka-get. Sa ato pa...” nako pa.
“Of course,” ni Debra. Nagpahiyom. Nibawos og pislit sa akong kamot.
“Unya kiss na lang ko” nako pa.
“Debraaaa!” tingog sa mama Lina ni Debra. Nangabli’s ilang bintana. Gibuhian ni Debra akong kamot.
“Unya na lang kay gitawag na ko ni mama” ni Debra nga nagdagan padulong sa ilang balay.
Gisundan ko siya’g tan-aw. Nisaka siya’s ilang hagdan. Nisulod sa pultahan nga may nag-abli. Dihang tua na siya’s sulod sa balay ug gisirad-an na ang pultahan, nitalikod ko. Wa ko kasabot sa akong gibati. Daw naglutaw ko sa hangin.
“Yes!” nako pa nga nilukso ug nisumbag sa hangin. (Katapusan)