Anak sa 'Ungo'

Gula 2

“Siya si Tina ang akong anak. Valentina ang tinuod niya nga ngalan nga gikuha sa akong ngalan nga Valentin,” gipaila-ila sa hamtong-lalaki ngadto kang Kenn ang anak niyang dalaga.

Nagpaila usab si Kenn ngadto kang Valentin ug kang Valentina. Gitunol ni Kenn ang iyang tuong kamot ngadto ni Valentina nga nasabot ni Kenn nga gibati og kauwaw kaniya ang dalaga.

“Gaw! Biya na diha gaw!” nadungog ni Kenn ang lanog kaayo nga singgit sa ig-agaw niya nga si Julian. Apan iya hinoon kini nga gikamay ug gisinyasan nga paduolon.

“Dili ka ba taga dinhi Kenn?” matud ni Mano Valentin. Miyango si Kenn dungan sa pagpahiyom. “Taga siyudad sa Sugbo ko Nong apan dinhi sa Anonang Norte kaniadto nagpuyo ang akong mga ginikanan,” matud ni Kenn.

Miyango-yango usab si Mano Valentin. “Mao diay. Ang rason nga mahadlok kanang imong duha ka kauban pag-anhi kay nahadlok kana,” matud ni Valentin.

Nahibulong pag-ayo si Kenn. “Nganong gikahadlokan ka man Nong Valentin nga maayo ka man nga tawo sa akong tan-aw?” nakapangutana si Kenn. “Tungod kay gidungog ko nila nga usa ka ungo,” mubo nga tubag sa tiguwang.

Kalit lang nanglimbawot ang balhibo ni Kenn. “Apan ayaw kahadlok Kenn, dili tinuod ang ilang gipalakaw nga tabi-tabi nga kami mga pamilya og ungo,” misagbat si Tina sa panagsulti sa iyang amahan ug ni Kenn.

“Mao diay nga nahadlok kaayo ang duha nako ka ig-agaw nga moanhi dinhi. Unya nganong dili man nimo ipapusil kadtong itum nga langgam Nong Valentin?” nangutana si Kenn.

Mipahiyom si Mano Valentin. “Talagsa ka na lang makakita og langgam uwak Dong, Kenn, sigun sa balita sa radyo maisip na gani sila nga endangered species mao nga angay nato sila nga protehean.”

“Nalipay ko nga wala ka mahadlok sa pagduol dinhi sa among payag Kenn kay ang ubang tawo dinhi sa among baryo, mahadlok bisan sa pakigsulti kanamo kay nagtoo sila nga kami mga ungo,” dugang pamahayag ni Tina.

Igo lang mipahiyom si Kenn ug naniid kun nagtug-an ba g’yud sa tinuod ang bag-o niya nga mga higala. “Duna ba’y mga ungo dinhi? Ug nganong gidudahan man kamo nga ungo?” nangutana na usab si Kenn.

“Usahay gud, makadungog sila og mag-wakwak diha sa kahoy panahon sa gabii mao nga nagtoo sila nga kami mga ungo,” mubo nga pasabot ni Mano Valentin.

 “Sigi Nong Val, Tina, mopadayon na ko pagpangayam sa unahan pero pwede ba’g mobalik ko unyang gabii dinhi?” matud ni Kenn. (Sumpayan)