Gula 60
“Imo kanang katungod, Almina. May katungod ka sa pagsunodsunod kang Erik aron imong masayran ang tanan niyang binuhatan. Tinuod man kaha nga may relasyon mo?”
“Nganong nakapangutana ka man og ingon niana?”
“Just asking Miss Almina. Ug kun wa ka nay laing tuyo nako, biyaan ko na ikaw. Okey?”
Wala motingog si Almina. Dihadiha mitindog si Angeline ug migawas sa canteen. Milahos siya ngadto sa library aron magtuon.
Apan sa iyang pagsulod, kalit lang napahunong paglakaw si Angeline. Nasigpatan dayon niya didto sa sulod sa library sila si Erik ug Robert nga seryosong nagkukabildo.
Midali si Angeline pagsibog samtang wala pa sila makakita niya. Mibalik siya sa iyang agi. Gilubok ang iyang dughan. Unsa man kahay gipanagsultihan nila ni Erik ug Robert? Nakapangutana siya sa iyang kaugalingon sa hilom.
Mibati si Angeline og kabalaka sa iyang nakita didto sa library. Nabalisa siya pag-ayo.
Ang hinungdan sa gibating kabalaka ug kabalisa ni Angeline mao nga nasayod siyang nagselos si Robert kang Erik. -- Sumpayan pa