Nanumpa si Brigido

Dihang gisugot si Brigido ni Gregoria sangko sa langit ang iyang kalipay kay sa katapusan naangkon ra gyud niya ang gugma sa babaye nga maoy natingban sa iyang pagmahal. Dugay na siyang naninguha sa dalaga.

Gani, may mga higayon nga likaylikayan siya niini kay duna man go’y tabitabi sa eskina nga ang amahan ni Brigido anak sa labing mangtas nga ungo sa balangay sa Dag-om Langit. Daghan na kuno kining gibalbal ug duna pa gyu’y higayon nga gibalbal kuno sa amahan ni Brigido nga si Constancio ang usa ka mabdos nga babaye nga hapit na manganak ug naunong gyud ang kinabuhi diha sa sabakan niini.

Ug mao kadtong nadungog na nga si Constancio mao gyud ang labing mangtas sa balangay sa Dag-om Langit ug kay daghan na man ang nagdumot kaniya maong usa kadto ka gabii may duha ka tawo ang misaka sa ilang balay ug way kukaluoy nga gimasaker ang magtiayon.

Tayming usab niadto nga didto matulog si Brigido sa iyang apohan nga si Magda nga otro pong mangtas nga dako. Ug maong nakahukom na lang ang apohan ni Brigido nga mamalhin na lang sila’g puyo dinhi sa balangay sa Bituon ug magpakabuhi na lang nga malinawon ug dili na mangabat.

Apan miabot ang adlaw nga mitokar ang pagka-ungo ni Brigido kay nagpanuigon na siya’g bayinti uno anyos ug dili usab kapugngan nga mangabat siya unya mamalbal. Nahunong lang ang iyang pagmalbal dihang gikaila niya si Gregoria.

“Dili ko gusto nga imo lang kong tiawtiawan, ha, Brigido?” ni Gregoria pa nga midip-ig sa ulitawo. “Kay mahal mo man kaha ako kinahanglan nga molungtad kini hangtod sa katapusan sa panahon...ug magbinuotan ka...”

“Dili ko gyud ikaw pasakitan, Goria, kay ikaw lang ang babaye nga gipitik ning akong kasingkasing,” gikuptan ni Brigido ang suwang sa dalaga dayon gihagkan ang mga ngabil. Napiyong ni Goria ang iyang mga mata sa kalalim sa halok ni Brigido.

Ug mao kadto ang sinugdanan sa wa’y kamatayon nga pagminahalay sa duruha. Unya, usa kadto ka mingaw’ng gabii nga naglakaw si Gregoria subay sa hilit nga dalan sa ilang baryo, maoy nadunggan niya ang singgit pakitabang sa usa ka babaye nga mora’g diha lang sa iyang duol. Tuod, paglingi niya maoy iyang nakita ang usa ka mangtas nga ungo nga mibugno sa babaye. Gipaak pa gyud niini ang liog sa babaye.

“Hoyyy! Mangtassss! Ayaw hilabti kanang babaye!” Gisinggitan ni Gregoria ang ungo ug sa paglingi niini nabantang ang nawong ni Brigido kinsa nagkadugo na ang mga ngabil.

“Brigido! Ikaw ni? Ungo ka diay! Haaa! Ungoooo! Kaaaa!! Dili na koooo nimoooo!” Misutoy pagdagan si Gregoria pahilayo sa nahimutangan ni Brigido kinsa nagpadayon pa gihapon sa pagbalbal sa babaye nga wala nay kinabuhi.

Pagka-sunod adlaw mitumaw si Brigido sa balay nilang Goria. Dili na unta makig-atubang si Goria kaniya apan kay gusto sa dalaga nga prangkahan na gyud niya kini nga wala na sila’y relasyon.

Nakahilak si Brigido ug miluhod siya sa atubangan ni Gregoria ug midanguyngoy sa paghilak.

“Dayyy, Day Goriaaaa!!! dili na ko mousab, Dayyyy. Unsaon man nga dili man gyud nako mapugngan ang akong kaugalingon kanang motukar na ang akong pagka-ungo. Oo, kaliwat mi’g ungo. Ang akong amahan namatay kay gipusil, ug hasta pud ang akong inahann... hu, hu, hu, hu!” Sagol bakho ang hilak ni Brigido.

Dinhi ingon sa natandog si Gregoria sa iyang nadungog ug nakita. Nakasabot siya. Ug dinhi nanumpa si Brigido nga dili na gyud siya mamalbal.

Ug matud pa niya kinahanglan nga kadinahan ang iyang mga bukton sa higayon nga motokar na ang iyang pagka-ungo aron dili na siya mangabat pa ug unya mamalbal og tawo. Tuod man gituman ni Goria ang sugo ni Brigido kay dihang misugod na pagdatom ang sakit sa pagka-ungo ni Brigido gikadenahan dayon siya ni Goria ug dinhi makapanlimbawot kaayong pamation ang ngulobbbb ug singgittt ni Bridigo.

“Hrrrrrmmm, aahhhhhh!! Ngrrrrkkkk! Wakkkkkk! Kwiiiiiii!! Urrrkkk.. yaaaaaooooorrrrkk!”

Miaringkil lang ang mga kadena sa kamot ug tiil kay dili na man gyud siya makagawas sa balay ug matag takdol sa bulan kadenahan gyud siya kanunay ni Gregoria. (Kataposan)