Sanggotan

Nagkabiba sa iyang taas nga sugong, sayo na sab nga tangkuon ni Onyok ang iyang lima ka punoang sanggotan sa limbaun nga lubi. Hilabihan ka hinuba ang limbaun nga lubi. Paspas ang mga tiil ni Onyok nga mitikang sa mga hakhak ning unang punoan sa iyang sanggotan nga tangkuonon. Gibati siya’g kahinam. Nahitungod man god kining maong punoan sa sanggotan sa balay sa magtiayong Noy Andoy ug Nang Kiray nga may bugtong guwapang anak nga maestra, si Nimfa, kansang banyo nga kaliguanan sa gawas, gikural og sin apan walay atop.

Kaduha na ka higayon nga naatlan ni Onyok nga nanangko siya sa ibabaw sa iyang sanggotan nga mao gyuy pagkaligo ni Nimfa nga hubo ang tanang lawas. Haskang tagbawa ni Onyok sa pagpamuso ibabaw sa punoan sa iyang sanggotan.

Alang sa mananggot, duha na sab ka higayon nga giisip niyang naangkon niya ang katahom sa guwapang maestra diha sa iyang pagpamuso. Kinsa bay dili ganahan? Bigot kaayo’g lawas si Nimfa. Ang duha ka tugsoy sa iyang dughan mora’g duha ka gagmay’ng bulkan nga naghitinghiting sa tumang kabus-ok.

Ug ang ugbon niyang inampingan, kyut kaayong tan-awon kanang sabunan na sa pagkaligo, nga gidisenyuhan sa pino ug kupkop nga salibunbon. Pun-an pa nga hamis ug puti kaayo ang kutis ni Nimfa!

“Hahay, igo ra gyud tawon kos pamuso ini sa ibabaw sa sanggotan! Ug ang mabuthan tawon mao ang bati’g nawong kong asawa nga si Tekla, nga kanunay lang manimahong ginamos ug hipon...!”: nagkibutkibot ang baba ni Onyok nga naghunahuna sa iyang asawa.

Si Tekla miabag kaniya sa pagpaninda sa ginamos ug hipon sa tiyanggihan sa ilang baryo.

Igo lang nakagradwar si Onyok sa elementarya dihang nangasawa kang Tekla nga igo lang sab nakatungtong sa kinto grado sa elementarya. Nasunod ni Onyok ang kabiling balay ug luna sa banika sa mitaliwan na niyang mga ginikanan sa ilang baryo.

Panguma ang iyang panginabuhian ug nananggot siya’g lima ka punoan sa lubi nga angay lamang sa iyang kaugalingong hinguhaw sa tuba.

Naanad man god si Onyok nga moinom gyud og tuba mata’g adlaw. Ug kay wala tugahi og anak sila si Tekla, miabag na lang sab ang iyang asawa sa pagpaninda og ginamos ug hipon sa tiyanggihan sa ilang baryo.

Ug tuod man, ning buntaga, didto sa kinaibabwan sa punoan sa sanggotan, natagbaw na usab sa pagpamuso si Onyok sa guwapang maestra nga hubo na sab nga naligo sa gikural nga banyo. Wa gyuy kalibutan si Nimfa nga gipamuso na sab siya sa siaw nga manananggot.

Gigil-asan na sab si Onyok sa ibabaw sa sanggotan. Nagpanilap siya sa gibating kalalim. Naghunahuna na sab siya sa iyang asawa. Si Tekla na sab ang iyang pahungawan ning buntaga sa dili pa makagikan paingon sa tiyanggihan.

Nagdaling mikanaog si Onyok sa sanggotan nga giganahan. Sa tantong pagdinali, naligas ang iyang tiil sa pagtunob sa hakhak sa lubi. Mihaguros ang iyang lawas nga nahagbong paingon sa ubos ug milagubo ang sampot sa yuta. Maayong pagkahuwad sa tinangkong tuba gikan sa sugong ngadto sa yuta. Gibati ni Onyok ang kasakit sa iyang sampot, nga maoy linugdangan sa sayo niyang pagpamuso ibabaw sa iyang sanggotan. (Kataposan)