Man hater

CEBU, Philippines - Wala magunok si Salie nga ingon sa wala’y nadungog. Wala siya motan-aw kang Yuri. Ang iyang mga mata didto ipunting sa gawas.

“Salie, I love you,” nakabaton na’g kaisog ang kasingkasing ni Yuri. “Sukad sa sinugdan mibati na ako niini kanimo.”

Mitingkag ang mga dalunggan sa dalaga sa iyang nadungog. Gianinaw niya ang dagway sa ulitawo. Daw sa aduna siya’y buot tugkaron sa gipamulong niini.

“Salie, gimahal ko ikaw,” matud na usab ni Yuri nga mikawhat sa tuong kamot sa dalaga ug hinay’ng gipisilpisil.

Si Salie dili buot motuo sa iyang nadungog. Kalit niyang gilabni ang iyang kamot nga gikuptan sa lalaki. Mihait ang iyang tinan-awan. Gilimuokan niya si Yuri.

“S-Salie, nga-ngano?” nakapangutana ang ulitawo nga nakalitan.

“Kun nagtuo ka nga masulod mo ako sa imong bulsa, nasayop ka, Inspector Cuyos!” Ug mihana siya paglakaw.

“Salie, kadiyot lang,” pugong sa ulitawo nga migunit sa iyang bukton. “Paminawa una ako.”

“Unsay akong paminawon nimo?” gisawilik niya ang kamot ni Yuri. “Bisan unsa pay imong isulti dili ako motuo! Wa’y mapili ninyong mga lalaki! Mga bakakon! Malimbongon! Mapahimuslanon!”

Sama sa gisuntok si Yuri sa kutokuto. Nahisagmuyo siya. Naamang sa makadiyot. Nasuta niya nga si Salie hingpit na gayod nga nawad-an og pagsalig sa mga lalaki tungod sa nahitabo sa ilang pamilya. Usa ka man hater ang dalaga. Apan misulay pa siya.

“Nasayod ako nga dili pa karon ang tukmang panahon sa pagtug-an kanimo niini,” ni Yuri. “Lab-as pa sa imong panumdoman ang nahitabo sa imong inahan ug igsoon. Apan dili mo usab angay ikasuko ang gisulti ko. Unsa may akong nasulti gikan gayod kini sa akong kasingkasing. Tinuod kini sa tanang tinuod. Gimahal ko ikaw.” -- Sumpayan pa