Ang textmate ni Pekto

Sa pangedaron nga kan-uman ug unom, inay mokalma na sa gimbuhaton nga angay na lamang unta niyang ihatag sa mga lig-on pa og pundasyon para sa mga lawasnong sambunot, si Pekto naglumpayat lang gihapon. Humok kaayo siya madani sa kaliwat ni Eba.

Daghan siya’g textmates nga iyang patuohon nga siya kuno batan-on nga nangita og pareha niya og edad. Usa ka buntag niana, naghuwat na si Pekto sulod sa kapehan aron pakigkitaan ang textmate nga nahatagan na niya og daghang load aron lamang kini masuod niya.

Nipahiluna dayon si Pekto sa kapehan sa may dalan Escario paghiabot niya untop alas diyes nga takna sa kabuntagon. “Aha, mao na ning dapita ang gi-text sa akong amiga. Kadaghan bang tawo dinhi. Maglisod man ko og plastada sa akong kaabtik. Wala pa ra ba ko kakita niya. Unsaon man gud pulos nagsalig man lang ming duha sa unlimited text. Wala gyud ko kadungog sa iyang tingog kay dili man siya motubag kun tawgon.” Naghinam-hinam na gyud si Pekto.

“Ehem. Love sori ha naulahi ko og abot?” may nabati si Pekto nga tingog sa babaye. Iyang gitan-aw ang gigikanan sa tingog. Medyo hamtong na kini nga nilingkod atubangan sa lamesa nga iyang gikapehan.

Hapit motungtong na sa pangedaron nga kwarenta sa iyang tan-aw. “Sori, ha. Wala ko kaila nimo. Dili ra ba ko magpadisturbo. Naa pa koy gibasa.” Medyo garboso nga pulong ni Pekto.

“Ako bitaw ni ang imong textmate. Si Elsa. Nailhan tika sa imong gisul-ob nga body fit,” hinay apan paraygon ang tingog nga nabati ni Pekto.

“Sori, dili Love ang akong ngan Ma’am. Palihug pangita lang og lain nga imong maduol. Naa pa koy gibasa,” dayong balik ni Pekto og pakli sa peryodiko.

“Si Love, baya ako lagi ni . He, he, sayod man gani ko sa nahimutangan sa imong mga awom ug mga uwat kay imo man kong gisultihan. Kana imong kirat sa walang mata, nasumbagan na kaniadto sa dihang nibayle ka og babaye nga dili nimo uyab. Kanang piang sa imong tuong abaga nga walay ayo-ayo, resulta na sa pagkatumba nimo sa motorsiklo samtang nag-drive ka nga hubog ug nagdala pa gyud og babaye gikan sa Kamagayan,” pulong sa babaye.

Pipila ka gutlo ang nilabay, nilakaw ang babaye kay wala man gayud kini tagda ni Pekto. Nilakaw na lang si Pekto nga gihabulan sa dakong kahibulong. Ang pamayhon sa babaye nga niduol niya sa kapehan wala man mohaum sa pamayhon sa iyang textmate.

“Dili gyud to mao ang akong textmate. Sa akong nasabtan sa mga mensahe niya sa among pagbawsanay og text. Estudyante ang akong textmate.”

Pagkasunod adlaw, gibasa ni Pekto ang mga mensahe sa inbox sa iyang cellphone. Gipabilin man gud sa iyang asawa nga si Pwerta ang iyang cellphone sa sobrang selos niini. Naniguro pud si Pwerta aron dili makapatuyang si Pekto og pangita og mga kulukadidang sa gawas. Hinuon wala mabasahi ni Pwerta ang mga mensahe sa cellphone ni Pekto kay gigamitan man kini og password.

Gipaningot si Pekto nga nagbasa sa mga mensahe gikan sa iyang textmate: “Nagkita ta ganina.

Laing mensahe: “Garboso ka man diay. Giduol na tika pero wala ka man gyud mangila nako. Estudyante pa ko sa kurso pagkamasahista.”

Kataposang mensahe: “Sige ha, nalipay lang pud ko nga wala ta magkakuyog. Kay naabot ang akong bana nga si Bruno gikan sa Munti. Iya kong gisorpresa. Nabalhog man gud siya sa bilanggoan human makakutlo og kinabuhi kaniadto. Naaktohan ko niya nga nakigtakos og himaya sa laing binuhat. Napasaylo nako niya. Apan dala sa kamingaw, nahimo tikang textmate. Salamat ha nga wala ka madala sa tintal. Basin ikaw unta ang ikaduhang mabawon ni Bruno balik sa bilanggoan.”

Wala dayon makalihok si Pekto sa iyang nabasa. Niginhawa og lawom. Nakaamgo na siya sa kakuyaw sa iyang gibuhat. Nabuak ang kahilom sa dihang gisampit siya ni Pwerta. “Pekto, dali mamahaw na ta. Andam na ang bakasi nga imong gipaluto. Sinilian baya ni. Imong paborito. Molakaw ka og sayo? Mga pulong ni Pwerta.

“He, he, dili ko molakaw og sayo, bakasyon ko ron Pwerta. Hala, mamahaw ta aron ikaw akong atimanon human nako og kaon sa bakasi.”

Nalingaw si Pekto nga namulong samtang mapahiyomon si Pwerta. Malipayohn silang duha. (Katapusan)