Gula 52
“Kamo na diay si Robert ang mag-on karon?” Pangutana ni Almina.
“U-unsa?” Nakugang si Angeline sa pangutana sa dalaga.
“Nakakita baya ko ninyo. Sweet kaayo mong tan-awon nga nagsultihanay kaganina. Sa akong tan-aw, pareson gyud mo.”
“Wa mi relasyon si Robert, Almina. Wa...!”
Ug gibiyaan ni Angeline si Almina sulod sa library.
Nianang pagkagabii, samtang nagtuon si Angeline sulod sa iyang lawak sa boarding house, gipahibalo siya ni Vera nga may bisita siya. Si Erik.
Nakugang si Angeline. Wala siya magdahom nga bisitahan siya ni Erik sa iyang boarding house. Unsa kahay tuyo niini kaniya?
“Tua siya sa sala, Day,” giingnan siya ni Vera. “Naghuwat nimo.”
“Unsa man kunoy iyang tuyo?” Nangutana si Angeline.
“Ambot lang. Natural, di gyud siya motug-an nako kay dili man ako’y iyang tuyo. Atubanga siya aron imong masayran ang iyang tuyo nimo.”
Giareglar ni Angeline ang iyang kaugalingon sa salamin. Pagkahuman, migawas siya sa lawak ug miadto sa sala. Nakita niya nga mipahiyom si Erik pagkakita kaniya nga nagkaduol sa nahimutangan niini. -- Sumpayan pa