Man Hater

Gula 48

“Lahi na gayod ang dagan sa panahon karon,” nakaingon ang dalaga. “Unpredictable.”

“Ingon usab niana ang tawo.”

Ug mihun-ag sa daklit ang kahilom. Si Salie mibiya sa bentana ug milingkod didto sa sopa.

“Imna na kiring imong Coke,” matud sa dalaga dihang wala mosunod si Yuri kaniya. “Bugnaw ra ba kaayo ni.”

Miduol ang ulitawo sa iyang nahimutangan. “Nganong usa ra man lagi kini ka baso? Ikaw diay?”

“Busog pa ko.”

“Maikog man sab ta nimo.”

“Putla kanang imong ikog.”

Nahikatawa si Yuri. Mikatawa usab si Salie.

“Bitaw,” sumpay ni Salie, “ayaw kabalaka nako kay ako’y tagbalay. Dili mahitabong higutman ko kay unay sa kosina.”

Mipahiyom ang ulitawo. Gipiyong ang pikas mata. Mipunit sa tinapay nga gibutang sa plato. Mikaon siya. Miinom sa Coke nga mabugnaw kaayo. Gihurot niya pag-inom ang ilimnon nga gidalit sa dalaga. Nakapanug-ab siya nga nabusog.

Thanks for the snack,” matud sa ulitawo.

“Ayaw’g pupasalamat, uy,” sa dalaga pa nga nagpahiyom. “Tingalig dili ka na makausab.”

Nahikatawa usab ang ulitawo. “Uy, unsa na ni? Wa na diay hinuoy esnak inigbalik nako?”

Mikatawa ang dalaga. Nahingataw-onon siya niadtong higayona. Nahingomedyahon. Ingon sa malipayon kaayo siya nga gikauban niya si Yuri.

Si Yuri nadani sa daghang mga magasin ug mga libro nga gihumpid pagpahimutang sa ilawom sa pasistor. Gikawhat niya ang Bisaya nga maoy naibabaw. Gisud-ong niya ang hulagway ni Anne Curtis nga maoy gidayan-dayan sa hapin sa magasin. Dayon gibasa ang teksto nga nahimutang dapit sa ubos nga nagtug-an sa unsay mabasa sa sulod. -- Sumpayan pa