Subli nga Panagkita

Gula 6

Nag-ilis si Myrna human sa ilang panihapon samtang si Roel didto magpaabot sa beranda sa balay nga nag-umbaw sa kinaubsan. Wala madugay migawas si Myrna. "Mora'g gipapitlan og rugby ang mga mata ni Roel nga pwerteng nakatutok kang Myrna.

"Mora man ko'g mahilis sa imong pagsigi'g tutok nako Roel," ni Myrna pa nga mora'g nauwaw. "Ayaw lang ko og did-i sa pagtutok nimo Myrn, gimingaw na kaayo ko nimo ug gusto ko lang nga busgon ang akong mga mata sa pagsud-ong nimo," gipahiyoman ni Roel si Myrna.

Nananghid si Myrna sa iyang mga iyaan nga kauban niya sa balay nga motambong siya sa kalingawan sa tenisan sa Giloctog. Nagsubay na sila sa dalan-dalan daplin sa dagat ug madungog na nila ang tukar sa sound system.

Apan kalit lang mitaligsik. Paspas sila nga milakaw apan daw gikasugat nila ang uwan kay nagkakusog. Napalingi-lingi sila sa palibot kun asa makapasilong. "Dimalasa uy, mabasa g'yud ta karon Myrn," matud ni Roel nga abtik kaayong mihukas sa iyang jacket ug gipakupo ni Myrna.

Mipasalipod sila sa punoan sa naghandag nga lubi apan nabasa gihapon sila. "Husto dunay gamay'ng payag-payag sa mananagat diha sa baybayon, tana Roel adto ta didto." Nagdagan sila si Myrna ug Roel paingon sa baybayon ug tuod, may gamay kaayong payag.

Misamot pagbunok ang uwan. "Basaa nimo Roel uy," nahingawa si Myrna sa ulitawo. "Sagdi lang Myrn, maayo ra usab nga nag-uwan aron romantic ang atong sitwasyon dinhi sa baybayon," ni Roel pa nga mikuot sa iyang panyo.

Gitrapohan ni Roel ang basa nga bukton ni Myrna ug gihikap ang sinena niini. Wala motingog si Myrna samtang gitrapohan ni Roel ang iyang bukton. Nasiklapan ni Roel nga basa usab ang nawong ni Myrna mao nga apil kini niya nga gitrapohan.

"Subra na man ang imong gihimo nako Roel. Gipagamit pa nimo nako ang imong jacket unya gitrapohan pa ko nimo. Ma-in love man sab ta nimo," matud ni Myrna. Hinay nga gigunitan ni Roel ang suwang ni Myrna ug mainampingon kini nga gihagkan.

"I love you Myrn," mipitik pagkusug ang kasing-kasing ni Roel ilabi na dihang mibawos paggakus kaniya si Myrna. "Roel, I love you too."

Nagparayganay ang duha taliwala sa pagbunok sa uwan. Bisan nangamig ang ilang basa nga kalawasan apan maoy mipasuwabi kanila ang kainit nga bunga sa ilang pagparayganay. (Sumpayan)