Ang excuse letter ni Dong Minggo

Asa man imong Mama’g, Papa, Dong Minggo? Sila na lay atong gihuwat. Imong mga classmates ug ilang mga ginikanan naa na gyud diri tanan. Pangutana ni Mam Mugsay Ugbangka sud sa ilang classroom sa Mantalaga Elementary School, nga nag-atubang kanila nagtalikod sa blackboard, naglingkod sa iyang lingkoranan samtang gipatong ang wala’ng kamot sa iyang teacher’s table ug ang tuong kamot namaypay kay alingiing ang panahon bisa’g giablihan ang tanang bintana sa ilang classroom.

Nauwaw si Dong Minggo. Miduko siya samtang gipatong iyang mga kamot sa desk. Grade I, pa siya.

Nagpatawag man gud ilang maestra og meeting para sa umaabot nga Nutrition Month nga pagasaulogon nila karong katapusang Biyernes sa buwan sa Hulyo, diri’s sud sa ilang tunghaan.

Buot man gud sa maestra nga masabutan ang mga ginikanan kun kinsay iyang padad-on og kamunggay, alugbati, kangkong, repolyo, pechay, sayote, talong, kalbasa, carrots, patatas, gabi, biga, ubi, saging, landang, sago. Kinsay moda’g isda, manok, kanding, baboy, para subak. Kinsay moda’g mais ug humay nga bugas. Kinsay moda’g mga kaldero, kaha, caserola, luwag, plato, kutsara, tinidor ug baso. Kinsay moda’g lamesa ug bangko.

Plano man gud sa ilang maestra nga magluto sila’g utan nga sinubaka’g manok bisaya. Magluto’g chop suey, pinakbet, ginamay, nilat-ang baboy, humba, pochero, kaldereta ug balbacua, grabe...Lansiao lay akoa, bi! Magluto pa gyud kuno sila’g binignit.

Hala! ang mga Papa’g Mama, masuko gyud ining mitinga kun masugdan na. Unsa, fiesta? Kay daghang kumbera! Septiyembre 21-22 pa tawon ang fiesta sa Talaga, uy! Makapangawot gyud sila ini sa tingkoy.

“Tubaga ko, Dong Minggo. Hain ang Papa’g Mama mo? Nganong wa man niari? Dyes minutos na ang nakalabay sa gikatakda nga oras alang sa atong meeting. Alas 2:10 na sa kahaponon. Nganong wa pa man sila mangari?” Pangutana’g usab ni Mam Mugsay Ugbangka nga singkwenta y nuybe na ang panugion. “Unsa man nang imong gisuwat diha?”

“Basaha lang na, Maam,” ni Dong Minggo, human ikatunol ang papel nga iyang gisuwatan.

“O, unsa man ni? Abi ko’g excuse letter. Mga drawing man lagi ni. Naay lalaki, naay babaye, naay iro, naay ering ug naay kahoy. Unsa may buot ipasabot nimo ini? Duol ra gud diri ug pasabta ko bi,” ni Mam Mugsay Ugbangka. Gikamay si Dong Minggo.

“Kuan ba, Mam...” ug gitudlo tagsa-tagsa ang iyang gipang-drawing. Ug misumpay “tatay, nanay, dog, cat, tree. Maong wa kaanhi ron, dinhi.” Ni Dong Minggo nga nagsandig sa kilid sa Maestra.

Ug nangatawa ang tanang tawo sud sa classroom. Nakatawa na lang pud si Mam Mugsay. Mitulo iyang laway. (Kataposan)