Subli nga Panagkita

Gula 5

Gisubay nila ni Roel ug Larry kadtong sementado nga dalan-dalan paingon sa balay ni Myrna nga nahimutang kilid sa bungtod. Nag-umbaw kini sa dagat. Dihang duol na sila sa balay, nadungog nila ang walay hunong nga paghot sa mga iro.

Nakita sa maghigala nga diha'y babaye nga mitambo sa bentana. "Day, naa si Myrna?" gisinggitan ni Larry ang babaye nga sa ilang pagtoo katabang sa balay. Wala motingog ang babaye apan mipahawa kini sa bentana. Nasabtan nila nga adunay giadto sa sulod.

Taud-taud, mitambo sa bentana sa balay ang usa ka babaye. Gikulbaan si Roel kay nasinati niya ang bayhon sa babaye nga mao si Myrna. Gisud-ong niya pag-ayo ang panagway niini nga maanyag gihapon bisan sa pagpanglabay sa mga napulo ka tuig gikan sa ilang panagkita.

"Myrn! Kumusta ka!" giwara-wara ni Roel ang iyang tuo nga kamot. "Kami ni Myrn si Larry! Still remember me?" misamot ang pagkuba-kuba sa dughan ni Roel. Wala dayon motingog si Myrna nga mitutok pag-ayo kanila.

Apan pagkataud-taud. "Roel! Kamo diay na? Dali dayon mo," nagdali si Myrna nga mibiya sa bentana sa ikaduhang andana sa balay ug misugat kanila sa pultahan. "Nasuroy man?" ni Myrna pa nga milamano kang Roel ug Larry.

"Ikaw g'yud ang iyang tuyo Myrn mao nga mibalik siya dinhi sa Barili. Nahinumdom siya nga pista na usab ug nahinumdom siya nga mao kini ang adlaw nga nagkaila kamo kaniadto," gipasabot ni Larry si Myrna.

Giliraw ni Roel ang iyang mga mata samtang naglingkod sila sa sala sa balay. Nagkalingaw sila og pagsultihanay. "Bay Roel, kay duna pa ko'y adtoon sa uban nako nga mga ig-agaw, biyaan ko usa ikaw dinhi sa ilang Myrna, magkita unya ta unyang gabii sa baylehan," ni Larry pa.

"Bitaw Roel, dinhi ka lang usa total hapon na man. Magkuyog ra ta sa baylehan unyang gabii," dugang ni Myrna. Maoy ampay ni Roel nga magkauban sila si Myrna mao nga wala g'yud siya mobalibad nga biyaan ra sa iyang higala.

Gibuhong pag-ayo ni Roel ang gihidlaw niyang mga mata sa pagtinutok kang Myrna. "Naunsa ka ba uy nga nagsige ka man og tan-aw nako? Basin mahilis ko anang pagsigi nimo'g tan-aw," nagpahiyom si Myrna.

Pagka kilum-kilum na, nagdungan sila nga nangaon ug si Myrna uban sa duha ka katabang nga iya ra nga mga iyaan. (Sumpayan)