Man Hater

Gula 45

Wala na motubay ang dalaga. Nahadlok siya nga mosangko sa panaglalis ang ilang pagbinayloay og katarongan ni Yuri. Dili ra ba gayod siya mosibog og debate. Mao nga gilain niya ang dugokan sa ilang gisultihan aron malikayan ang panag-irgo. “Giunsa mo pagkasayod sa akong gipuy-an?”

“Nakita nako ang imong address sa imong ID,” tubag ni Yuri.

“Unsa?” nakaingon si Salie. Bantog ra nga niadtong nahinabi niya kini didto sa presinto nakamatikod siya nga gitutokan sa lalaki ang iyang ID. “Maayo ka diay mohimo og gimik, no? Apan ayaw pagtuo nga mibelib ko nimo niana, Inspector.”

“Wa ko magpabelib kanimo, Miss Valle,” matud sa ulitawo. “Nasayod ako nga dili ka bastabasta mobelib og tawo.”

Wala motingog si Salie. Apan nahimuot siya sa hilom sa gisulti sa inspektor.

“May ihangyo unta ko nimo,” matud na usab ni Yuri, “kana kun mahimo.”

“Unsa kana?” ni Salie.

“Mahimo ba nga di ta kaayo magpormalay?”

“Sabton nga di na ko mag-inspector nimo ug di na sab ka mag-Miss Valle nako?”

“Oo.”

“Okay.”

Dihay kahilom nga miulang tali kanilang duha. Dayag nga gikumpayotan ang masig nila ka balatian sa panagana.

“Adunay buot nakong masayran gikan nimo, Yuri,” mibuak si Salie sa kahilom.

“Unsa kana, Salie?” gitan-aw ni Yuri ang dalaga.

“May nakuha na ba kamong lead sa kaso ni Debbie Balatan?” -- Sumpayan pa