Mata sa Kasingkasing
Gula 48
Gusto siyang molikay kang Erik maong mitipas siya sa laing agianan. Apan si Erik miagpas kaniya.
“Angeline, kadiyot lang,” ni Erik pa.
Wala manumbaling si Angeline. Mipaspas hinuon siya sa paglakaw. Dili na siya gustong makigsulti kang Erik. Alang niya, wala na sila’y angay pang panagsultihan. Gusto na niyang likayan sa hingpit ang ulitawo.
Apan naapsan gayod si Angeline ni Erik.
“Ngano bang molikay ka na man nako?” Nangutana si Erik dihang nag-abay na sila sa pagpanglakaw.
“Palayo nako,” giingnan niya si Erik. “Tingalig makit-an ka ni Almina. Di ko gusto’g gubot.”
Namugos gyud si Erik nga makigsulti kang Angeline. Wala na makabalibad ang dalaga. Nanggawas sila sa school campus aron magkasulti sila’g maayo. Misulod sila sa usa ka snack bar nga nahimutang dili layo sa ilang eskuylahan. Mi-order si Erik og esnakonon alang nila.
“Unsay atong panagsultihan, Erik?” Si Angeline ang mibukas sa ilang panagsulti.
“Ngano bang molikay ka na man gyud nako?” Misumbalik pagpangutana si Erik. -- Sumpayan pa
- Latest
- Trending
