Nasinati ba ninyo nga adunay tabon sa botelya nga gahi kaayong ablihon? Magisi na lang kini’g linigwat dili gayod maabli. Ang maayo natong buhaton niini mao ang paghumol sa tabon sa mainit nga tubig. Kay sa higayon nga mainitan pag-ayo ang takob mobukad kini ug niini dali nang ablihon kay luag na man. (Mariano F. Mañus, Sr., BN, Hulyo 12, 1996)
Ang iro
Ang iro labihan kalangas. Nabatasan na niini ang pagpunay og dagan. Kun kini maoy mohagwa modagan tuyoktuyok una pa mohamag sa linalang nga iyang hagwaon. Kun moabot ang agalon nga iyang namingawan mokanuos kini pagdagan tuyok sa iyang amo dayon niining baiid sa mga tiil. Unya, maglumpatlumpat ug mag-angkas-angkas. Tungod sa kalangas ug kakusog modagan sa iro kini ang tahasan sa iyang agalon sa pagpagukod sa mga mananap nga buot niining sikopon.
Apan bisan pag maghagal ang iro sa labihang kakutas dili gayod kita makakita nga magdunghay sa singot ang kalawasan niini. Kini tungod kay duha lamang ka dapit sa lawas ang panington. Ang maong mga dapit mao ang ilong ug bugan. (Mariano F. Mañus, Sr. BN, Hulyo 21, 1996)