Maka-open

Dear Tita Salie,

Have a wonderful day. Just call me Sam, 17 years of age ug taga Danao, Cebu.

Dili kaayo ko kanunay mobasa sa imong column tungod kay bisi kaayo ang akong life panagsa ra gyud intawon ko makalugar. Apan kun makalugar gani ko mopalit gyud ko og Banat News aron makabasa ko sa mga sugilanon ug sa imong column.

Ang akong problema kay duna koy kababata nga tawgon lang nato siya og Mr. G. Dugay na gyud mi nga suod kaayong managhigala. Maka-open na gud ko niya sa akong mga problema. Akong masulti kaniya ang akong mga kahiubos ug andam usab siya nga maminaw kanako. Ingon man usab siya ngari kanako.

Ang nakaapan lang, Tita, kay hinayhinay nga nahulog ang akong loob ngadto kaniya. Lahi na man ang akong gibati ngadto kaniya. Mora og na-develop ko niya, Tita. Wala ko masayod kun ma-feel niya nga na-inlove nako niya. Apan wala ko nagpasabot kaniya nga lahi na ang akong gibati kay mauwaw man ko. Wala ko masayod kun pareho ba ang among gibati.

Unsay akong buhaton, Tita, huwaton lang ba nako nga mahibaw-an niya o ako siyang sultihan? Palihog pasabta ko. Thank you very much and more power.

* **

Dear Sam,

Mas nindot ang relasyon kun kini nagsugod sa panaghigalaay. Maong ang kaminyoon kun ang imong bana o asawa imong best/close friend sa una. Tungod kay kaila na kaayo mong daan sa usa’g-usa ug sa inyong sitwasyon mas nindot pa gyud kini kay maka-open ka na man kaniya sa imong mga problems o mga sekreto sa kinabuhi.

Atong makita sa mga mag-best friend, nga bisan sa kasakit anaa gyud sila nag-inunungay, anaa gyud ang usa’g-usa aron iyang unongan ang iyang suod nga higala kun ingon niini ang foundation sa inyong gugma I’m sure nindot gyud ang dagan unya sa inyong kaminyoon o relasyon.

Apan wala ko nag-ingon nga minyo-i siya, tungod kay ikaw usa man ka babaye maghuwat ka lang gyud nga manguyab siya kanimo ug dili ikaw ang manguyab kaniya. Imong huwaton nga anaa usab siya sa maong pagbati. Ipadayon lamang ang inyong kasuod ug ang imong kaayo ngadto kaniya kay sa dili madugay moturok ra usab sa iyang dughan ang pagbati nga naa karon naghari sa imong kasingkasing. -- Tita Salie