Subli nga panagkita

Gula 2

Nagsugod na ang kalingawan didto sa tennis court pag-abot nila ni Roel ug kaubanan. Naglaray ang mga dalaga nga nanglingkud sa semento nga lingkoranan.

Gipaliraw ni Roel ang iyang mga mata ug gipangita si Myrna niadtong mga dalaga nga nanglingkud. Wala g’yud siya mosipyat kay nakit-an niya kini nga didto sa kinatungdan naglingkod.

Giobserbahan ni Roel ang pagsayaw sa mga babaye. Wala tuod magkomedya si Myrna sa iyang pag-ingon nga piit ang sinayawan sa mga dalaga sa ilang lugar.

Wala mag-usik og higayon si Roel. Mipalit siya og sonata aron silang grupo makasayaw. Dihang ila nang torno sa pagsayaw, diritso siya nga mipaingon sa nahimutangan ni Myrna.

Gisugat siya og pahiyom sa dalaga nga walay pupanagana nga midaitol sa iyang dughan ngadto sa dughan ni Roel. Gibatyag ni Roel ang talagsaong kainit gikan sa lawas sa dalaga.

Tungod sa kapiit sa ilang paggaksanay, usahay magbinag-iray ang masi’g nila ka tiyan. “Wala ka g’yud magkomedya Myrn da, nindot kaayo mo modala og bayle dinhi kay piit kaayo.”

“Gusto ka diay og lagyo ra?” ni Myrna pa nga nagpahiyom. “Pwede ba kita nga magka estorya sa gawas sa baylehan Myrn? Magpauban unta ko nimo nga mosuroy sa nindot nga baybayon,” hagawhaw ni Roel kang Myrna.

“Sigi, tulo ka tukar gikan karon mogawas ko. Huwata ko duol sa pultahan sa kapilya,” ni Myrna pa.

Gipahibalo ni Roel sila si Larry ug ang uban niyang kauban nga manuroy sila si Myrna sa baybayon. Mahinamon nga nagpaabot si Roel kang Myrna didto sa duol sa kapilya.

Tuod nakita niya nga nagpaingon na si Myrna sa iyang nahimutangan. “Tana nindot bitaw isuroy karon sa baybayon kay hayag ang buwan,” sa dalaga pa nga nagpahiyom.

Gigunitan ni Roel ang kamot sa dalaga ug nanglakaw sila paingon sa duol ra nga baybayon. Nakita nila kadtong lantay’ng kawayan nga gihimo ilawom sa punoan sa kahoy.

Hinay ra ang bawod nga matag karon ug unya mohapak sa lapyahan nga maoy nakadugang sa kamabulokon sa kagabhion. Unya kalit lang sila nga nangahilom.

“Uy nganong hilom ka man?” ni Myrna pa nga maoy mibuak sa kahilom. “Aw, naglibog man gud ko kun unsaon pagsugod,” gitutokan sa ulitawo si Myrna. Wala motubag ang dalaga. Nakasabot na siya unsay sunod nga mahitabo. “Dili ka ba masuko kun manguyab ko nimo Myrn?” naseryoso ang tingog ni Roel. (Sumpayan)