Ang mata ni Roldan

Disyembre na usab ug ang dakbayan misugod na gayod kaaligre. Tungod sa diwa sa Pasko. Gidayandayanan na usab ang dakbayan sa nagklase-klasing mga gagmay ug dagko nga bombelya nga dagitabnon. Diin magpid-uk pid-ok ang lain-laing mga bulok sa siga nga nag-indigay gayod sa ilang kahayag ug katahoman.

Buta si Roldan nga bata. Wala makakita sa kaanindot sa mga dayandayan sa Pasko. Bisan sa ilang mga parol ug krismastre diha sa sulod sa ilang harianon nga panimalay. Diin maoy nagtug-an sa kamatuoran sa kaadunahan sa iyang maestra nga inahan nga si Ma’am Elizabeth sa University of San Carlos.

“Ma, hain man diay si Papa?” gipangutana ni Roldan si Elizabeth ang iyang inahan.

“Atua Dong sa Amerika tungod sa iyang pagka-doktor. Nag-eskuyla sa pagka-espisyalista sa mga buta nga mata. Aron ikaw makakita na. Nagmaster siya sa  eye transplant didto!”

Paghiuli ni Dr. Antonio Villacorta sa ilaha dinhi sa Sugbo si Roldan ang anak niyang buta maoy una niyang pasyente alang sa pag-opera sa mga mata. Diha lamang kini niya buhata sa sulod sa ilang panimalay, uban ni doktora Edna Montecillo, nga sama usab kaniya nag-master sa pag-opera sa mga buta.

“Areglado na, ang una natong pasyente nga mao ang imong anak Dr. Villacorta,”  matud pa ni Dra. Montecillo, nga mipahiyom ni Dr. Villacorta ug ni Elizabeth sa asawa niyang maestra.” Makakita na gayod si Roldan unya. Inig tangtang sa bendahi nga gitaptap sa iyang mga mata!” matud pa sa doktora nga mipahiyom.

“Daghang salamat, Dra. Montecillo sa imong pagbulig kanako. Hinaot pa unta kita nga magmalampuson!” tubag usab ni Dr. Villacorta nga mapahiyumon.

“Pa, kang kinsa kining mga mata nga gipuli mo sa akong mga buta nga mata?” Gipangutana ni Roldan ang iyang papa!

“Mata kini Dong Roldan sa atong iro nga si Puppy nga imong pinangga!”

“Sa ato pa diay pa, si Puppy na usab karon ang buta? Kaluoy baya ni Puppy pa, nga karon siya usa na ka buta!”

“Ayaw kabalaka Roldan, kay ilisdan ko ang mga mata ni Puppy sa mga mata sa iring!”

Ang “Eye transplant” sa mga buta nga mata ni Roldan gayod nagmalampuson. Makakita na gayod siya karon sa mga paskohanon nga talan-awon. Silaw usab ang silaw sa adlaw!

“Bisan mga mata sa iro ang mga mata ko, makakita na gayod ako karon sa mga katahom sa pasko. Hasta usab ni Jesus Manunubos ning kasaulogan karon sa malipayon kong pasko, uban ni Papa ug Mama!” ni Roldan pa nga mipahiyom ug mikatawa. (Kataposan)