Man Hater

Gula 42

“Hinugay na nianang imong mga bolada!” nangalum-it ang tingog sa dalaga sa kaisog.

Napug-ok si Allan. Sama siya sa nasugsog sa pinugngang singhag ni Salie. Nahisagmuyo siya nga gibatyag ug kaulaw.

Kun wala pa kaha sila sa daghang tawo niadtong higayona, tingali milanog na ang tingog ni Salie sa kamasuk-anon. Nagpugong lamang ang dalaga sa kaugalingon kay dili siya gusto’g eskandalo. Edukada siya nga pagka-babaye.

Mitindog si Salie nga misamot pagpamula ang dagway. “Kun gusto ka nga magdugay ang atong panag-uban sa trabaho, hunonga kanang binuang mo! Di ko gusto nga maghisgot ka pa og gugma! Alang kanako, wala’y gugma! Wala!”

Ug gibiyaan niya si Allan. Miuna siya paggawas niini sa Jollibee nga masuk-anon.

Samtang nagpadayon pagligid ang mga adlaw, si Salie maoy kanunay giatubang ang iyang katungdanan sa publikasyon. Gitingob niya ang iyang panahon sa pagpanulat. Ang iyang laraw sa pagpanimalos sa lalaki nga maoy nakaingon sa kamatayon sa iyang igsoon iya unang gipadaplin. Ang iyang kaisipan midasig kaniya ug miganoy ngadto sa usa ka malig-ong pagtuo nga magkita ra gihapon sila si Roger inig-abot sa tukmang panahon.

Maoy kauban kanunay ni Salie si Allan sa iyang mga lakaw. Giwala na kadtong iyang kapungot niini. Ang ulitawo wala na gayod mousab pagpalabtik kaniya bahin sa gugma. Naglikay kini sa kasuko sa dalaga.

Usa niana ka hapon-Domingo kadto (alas-3:00 ang takna) ug wala’y trabaho -- si Salie diha sa garden set sa lagwerta. Napahunong siya sa iyang gibuhat dihang may sakyanan nga mihunong sa tungod sa gate. Mitindog siya ug gisusi kun kinsay nahiabot.

“Maayong buntag, Miss Valle,” mihatag og katahoran ang ambongang lalaki sa iyang pag-abli sa pultahan nga agianan sa tawo. “Mahimo bang makadayon?” -- Sumpayan pa