Makapa-in Love

Gula 7

Naglami g’yud ang ilang pagparayganay ni Vincent ug Lynlyn. Mibunok usab pag-ayo ang uwan ug hinay-hinay na nga mihabol ang kangitngit sa kalibotan.

Dungan usab nga nahikalimot sila si Vincent ug Lynlyn sa ilang tagsa-tagsa ka kaugalingon mao nga wala na niya pugngi pa ang tinguha sa ulitawo nga gusto nga moangkon sa iyang pagka babaye.

“Adto ta sa imong kwarto sa taas,” giingnan ni Vincent ang dalaga nga wala motingog apan wala usab mobalibad. Dali ra kaayo sila nga miabot sa taas ug didto gipadayon ang pagparayganay.

Ikatandi si Vincent sa usa ka gutom kaayong kabaw nga walay puas sa pagsibsib sa lapyo kaayo nga mga sagbot. Igo g’yud sila nga nahuman sa ilang pagparayganay.

“Vincent! Vincent! Lynlyn! Ablihi mi,” sangpit sa inahan ni Vincent. Nagdali ang ulitawo nga misul-ob sa iyang short pants ug nagdagan nga nanaug aron buksan ang pultahan.

Basa kaayo ang mga sapot sa amahan ug inahan ni Vincent. “Nagpasinguwan na lang mi Dong kay mora’g wala na’y pagtuang ang uwan,” pasabot sa amahan ni Vincent.

“Hain si Lynlyn?” nangita ang inahan. “Tua sa iyang kwarto tingali Ma,” abtik nga tubag ni Vincent.

Nanglabay ang mga adlaw, mga semana ug pipila ka buwan sa pag-estar ni Lynlyn sa ilang Vincent. Wala na malilong pa sa mga ginikanan ni Vincent nga ang ilang anak may relasyon ug sa ilang katabang.

“Wala kami pagsupak sa inyong relasyon Vincent, Lynlyn. Among nasabotan ni Papa nimo nga mas maayo pa nga magpakasal kamo ug anhi lang gihapon mopuyo kay bugtong ka man namo nga anak,” matud sa Mama ni Vincent.

Human sa ilang panihapon, nagsultihanay ang maghinigugmaay didto sa balkon sa balay. Buwanon ang maong gabii ug mabulokon kaayo sud-ongon ang kabukiran ug ang mga suga sa dagitab didto sa kinaubsan.

Gihagkan ni Vincent si Lynlyn samtang nagtupad sila sa paglingkod. “Palihog tug-ani ko Lyn kun unsay imong nagustohan kanako?”

Mipahiyom usa si Lynlyn. “Makapa-in love ka man gud Vincent tungod sa imong pagka matinagdanon ug manggihuna-hunaon.” Wala makapugong si Vincent sa pagpahiyom ug gipatikan og hawok si Lynlyn. “Giswerte usab ko nga nagkakita kita dihang diriyot ka madam-agi og sakyanan didto sa eskena Escario ug Gorordo Avenue .”

Ila dayong giadto ang mga ginikanan ni Vincent. “Pa, Ma, tumanon na namo ang inyong tambag nga magminyo na kami. I-atul nato sa birthday ni Lynlyn unya sa Mayo 15 ang kasal,” ni Vincent pa. (Kataposan)