Mata sa Kasingkasing

Gula 44

Pagkabuntag, gisungog si Angeline ni Vera.

“Nakauyab tingali ka gabii no,” nagkatawa nga namulong si Vera.

“Naunsa ka diha?” gikan ni Angeline.

“Mora man gud og sweet mo kaayo niadtong kapares mo sa disko.”

“Taga Danao to, among silingan.”

Wala na tug-ani ni Angeline si Vera nga ex-boyfriend niya si Christopher. Alang niya wala na kini kinahanglana.

Pagkaugma, nangadlawon sila’g sakay og bus paingon sa dakbayan sa Tagbilaran.

Pagkasunod adlaw sa pagsulod ni Angeline sa school campus, gisugat siya ni Vera. May mahinungdanon kining tuyo niya. Wala dayon motug-an si Vera sa tuyo niini. Gidala siya niini ngadto sa opisina sa The Word, ang school organ sa ilang unibersidad.

“Unsa bay gusto mong isulti nako?” Gipangutana ni Angeline si Vera dihang naka-pahimutang na sila sa pagpanglingkod sulod sa opisina sa The Word.

“Wa ka pa ba masayod bahin sa nabaniog nga balita karon sulod sa school campus?” Gisumbalik og pangutana ni Vera si Angeline.

“Bahin sa unsa?” Sukit ni Angeline. -- Sumpayan pa