Happy Valentine's kanatong tanan

Nganong nagsintemental ka diha?!” ni Delia ngadto’s iyang kapikas nga si Jomar. Naghilak si Jomar pagsulod nila sa sala sa ilang balay karong hapona. Sa pag-abot dayon nila, wa pa gani kasulod sa pultahan sa balay ang magtiayon, nisugat dayon ilang mga anak. Niamin sa ilang inahan, nihawok sa aping ug ni-greet og Happy Valentines. Ug ni-greet sab sa ilang amahan.

“Happy Valentine’s Day, Pa!” “Happy Valentine’s Day, pa!” “Happy Valentines day, Pa!” matud sa tulo ka mga anak nga sila si Jerome, Byron ug Ingrid.

Mga ulitawo’g dalaga na. Niamin ug nigakos ni Jomar iyang mga anak ning sayong kahaponon pagkahiuli niya gikan sa ospital. Nipugos gyud siya’g uli kay gusto siyang adto sa iyang balay makig-uban sa iyang pamilya sa Valentine’s Day.

Nagtangkil siya’g plastic nga tubo nga gi-insert sa operasyon sa iyang tuong kilid ug plastic nga sudlanan sa dugo ug plema nga mahabwa gikan sa iyang baga. Nasakit siya’g pneumonia, komplikasyon sa dayabitis.

Naputos sa plema sa iyang baga ug naglisod og ginhawa. Gihabwa ang mga plema sagol nana ug dugo gikan sa iyang baga pinaagi sa buslot sa iyang kilid nga gipasuyopan pinaagi sa tubo nga plastic. Tiniti nalang ang nanggawas nga plema ug maayo na iyang pagginhawa. Napulo ka adlaw siya sa ospital.

“Salamat kaninyo mga anak,” nagtibi si Jomar nga namulong. “Ug salamat sab kanimo Del” niya pa nga nigakos sa iyang kapikas, nga maoy kuyog niya pag-abot sa balay ug maoy nagdala sa mga bag nga sinudlan sa ilang gamit gikan sa ospital. “Paita diay unta nako no, kun wa pa mo akong asawa’g mga anak,” ni Jomar nga nidanguyngoy.

Ilong tuwapos na si Jomar. Unom sila ka managsoon. Kamanghuran siya. Ilang kamaguwangan si Roy, minyo na ug may duha na ka anak. Naglain nag puyo. Sunod nga igsoon si Rose nga minyo na sab ug naglain nag puyo. Ikatulong maguwang niya si Abeth nga minyo na sab ug may dakong pamilya. Ikaupat niyang maguwang si Lina nga naminyo’g German, tua nas Germany namuyo. Ikalima si Marivel nga naminyo’g Amerkano. Tua nas America namuyo. Kay kamanghuran, si Jomar ang gipapuyo sa ilang ancestral home sa baryo Umbria.

Sa ulitawo pa, nagsalig si Jomar sa iyang mga maguwang. Kay siya lagi kamanghuran, baby sa pamilya. Apan lahi na diay kun naminyo na ug may tagsatagsa na ka pamilya iyang mga maguwang. Wa na siya’y maduolan. Labi na nga patay na ilang mga ginikanan. Motabang man gihapon iyang mga igsoon labi na mahitungod sa problema sa kuwarta. Gani sa pagka-ospital niya, nagtampotampo gyud iyang mga igsoon sa iyang bayranan. Kay dili niya makaya ang P300,000 nga bayranan sa ospital, tambal ug mga doctor. Apan ang labing bug-at ug importante, ang pagtukaw diay sa pasyente ug pag-amuma samtang naa pa sa ospital. Kana maoy dili mahimo sa iyang mga igsoon. Maayo gani kay may asawa siya’g mga anak nga masinabtanon. Ug mapinanggaon.

Sekyu si Jomar sa Beth Horon Commercial Bank. Si Delia sekretarya sa mayor sa ilang lungsod. Si Jerome ilang kamaguwangang anak, first year na sa kursong Computer Engineering. Si Byron graduating sa hayskul. Si Ingrid, third year sa hayskul. Wa na sila’y matigum kay kulangon na gani ilang suweldo sa inadlaw nilang panginahanglan. Maayo gani kay wa sila’y abangan sa balay. Ug ang kuryente nga kunsomo nila gibayran binulan ni Lina. Ang tubig gibayran binulan ni Marivel.

“Nagpasalamat lang ko sa Diyos nga nia mo. Ug akong isaad nga sukad karong Valentine’s Day, mag-amping nako sa akong panglawas alang kaninyo. Dili na ko gustong mahasol pa mo pag-usab sama sa inyong kahasol dihang naospital ko,” ni Jomar. Nipahiyom si Delia sa kalipay. Natandog siya ug nitibi nga nigakos sa iyang kapikas. Gipikpik niya ang bukobuko sa kapikas. “Unahon nimo pagbiya imong bisyo sa inom ug panigarilyo. Mag-exercise ka na ug magkontrol sa pagkaon” ni Delia. “Buhaton ko na tungod ug alang kaninyo” ni Jomar. Paghuman nila’g gakos, nigakos na sab ni Jomar tagsatagsa ilang mga anak.

“Mangaon na ta, Pa, Ma” ni Ingrid. “Kay duna mi diyutay’ng hikay para sa paghiuli ni papa,” ni Jerome. Giagak ni Byron iyang amahan padulong sa lamesa.

“Salamat Lord nga duna koy pamilya nga sama ni Delia ug akong mga anak,” nihangad si Jomar sa kisame.

“Ug Happy Valentine’s kanatong tanan!” dugang niya. (Katapusan)