Wala na mouli

Dear Tita Salie,

Have a nice day. Dugay nako nga tigbasahan og Banat News kay makalingaw gyud. Ug ganahan pud kaayo ko nga mobasa sa mga p roblema sa laing tawo ug sa imong nindot nga tambag sa Pasabta column.

Problemado pud kaayo ko nga tawo, busa naaghat pud og padala sa akong problema, Tita, kay basin kun imo kong malamdagan.

Tawga lang kog’ JB, 33 years old ug usa ako ka minyo. Duna ko’y tulo kabuok mga anak ug ania kami namuyo sa probinsya sakop ra sa Sugbo.

Tungod sa kalisod sa among panginabuhian diri sa among lugar, nilakaw ang akong asawa ug mianha diha sa siyudad aron mosulod og trabaho. Nakasulod siya’g trabaho isip usa ka katabang sa balay.

Sa bag-o pa nindot ra ang among communication. Bisan tuod mingaw kaayo apan amo lang giagwanta kay makatabang man gyud ang iyang sweldo sa among pagpuyo. Apan hinayhinay nga nausab ang akong asawa. Panagsa na lang siya nga mopauli aron maghatod og kuwarta. Panagsa na lang pud siya manawag o kaha mo-text sa cellphone. Samtang nagkadugay siya sa iyang trabaho nagkahanap usab siya ngari kanamo. Hangtod nga nikabat gyud og duha ka tuig nga wala siya mouli. Ug ako na lang nahibaw-an nga duna siya’y kapuyo nga tomboy.

Sakit kaayo alang kanamo ang iyang gibuhat, Tita. Palihog pasabta ko sa akong buhaton. Daghang salamat sa maong pagtagad. -- JB

* * *

Hello JB,

 Pasensya ra gyud ang una natong tambal alang sa atong kaugalingon nga nasakitan. Ug atong dawaton ang nahiagoman sa imong asawa. Dili gyud siya lig-on sa iyang pagkatawo nga naanod man siya sa bul-og sa pagsulay. Apan mas maayo unta kadto kun sa bag-o pa dihang imong naobserbahan ang kausaban, dihang panagsa na lang siyang mopauli sa inyong pinuy-anan imo na unta siyang gipangutana ug gipanid-an o kaha imo na siyang gipahunong sa trabaho. Apan sanglit anaa kana sa maong sitwasyon pilit gyud nga imo kanang atubangon.

Kun nasayod ka kun asang dapita magtrabaho ang imong asawa, kun gusto pa ka makigbalik kaniya, adtoa siya sa iyang gitrabahoan. Suroya siya didto ug dad-a ang inyong mga anak aron inyong maestoryahan ang angay ninyong sulbaron.

Tingali kun iyang nakalimtan ang iyang responsibilidad sa inyong pamilya. Of course, sa imong pagpakigkita kaniya ayaw siya kasuk-i, dapat kalmado ka nga makigsulti kaniya aron maminaw siya kaninyo. Hangyoa ninyo siya nga mopauli nalang ug biyaan na lang ang iyang trabaho. Ang imong anak ang paestoryaha niini kay walay inahan nga dili malukmay sa hangyo sa iyang anak. -- Tita Salie