Mata sa Kasingkasing

Gula 42

Ang balay nila ni Vera nahimutang atbang ra gayod sa basketbolan.

Niining tungora, naglanoglanog na ang tugtog sa sound system didto sa basketbolan nga gipadayandayanan sa mga sugang nagkadaiya ang kolor.

“Motambong ta sa disco unya,” nagkanayon si Vera dihang nakapahimutang na sila sulod sa lawak niini.

“Sige,” sanong ni Angeline.

Human sa panihapon, nangandam dayon sila si Angeline ug Vera aron pagtambong sa disco. Pasado alas nuybe sa kagabhion misulod na sila sa diskohan. Daghan nang nanayaw niadtong tungora. Nanglingkod una sila si Angeline. Pagkataudtaod, misugod na sila pagsayaw. Sulod sa diskohan, gikahimamat ni Angeline ang pipila ka mga lalaki. Ang kasagaran mga higala ug mga ig-agaw ra usab ni Vera.

“Apan ang napahikugang ni Angeline mao ang wala damhang panagkita nila ni Christopher sulod sa diskohan.

“Nganong niabot ka man dinhi?” pangutana ni Christopher dihang nanayaw na sila si Angeline.

“Mikuyog ko sa akong ka-boardmate nga taga dinhi,” tubag ni Angeline. “Ikaw nganong nia ka man sab dinhi?”  -- Sumpayan pa