Man Hater

Gula 38

Paggradwar niya sa hayiskol, si Allan giregalohan og kamera sa iyang amahan. Sukad niadto, nangandoy siya nga mahimong sikat nga potograpo damlag. Wala’y pagsupak ang iyang papa Ludivico sa iyang gusto. Mikuha siya’g kurso nga related sa photography ug pagkahuman, nakatrabaho siya sa usa ka fashion magazine.

“Unsay ngalan sa magazine?” gitutokan ni Salie ang ulitawo.

“Women’s Digest,” untop nga tubag ni Allan.

“Magbasahan ako niana,” miingon ang dalaga. “Duna sila’y model kaniadto nga nagustohan nako. Matahom siya. Buotan ug nawong. Siya si...si Amanda. Husto si Amanda Miranda. Nakaila ka ba kaniya?”

Kalit milandong sa kasubo ang dagway sa ulitawo. Milihoklihok ang iyang ubol-ubol.

Si Salie gisaog sa kalibog sa nakitang reaksiyon sa lalaki sa iyang pangutana.

“Allan, ngano?” tugob sa katingala nga nangutana ang dalaga.

Mibuhi si Allan og halawom nga panghupaw una motubag. “Amanda was my girlfriend.”

Nakugang si Salie. Unsa diay? Naglisod siya pagtuo nga nahimong hinigugma ni Allan ang sikat nga modelo nga iyang idolo. “Si Amanda Miranda?” nakasuna siya nga mitutok pag-ayo sa ulitawo.

“Siya,” ni Allan pa.

“Pagka-suwerte nimo, Allan!” nakatuaw siya.

Miyango ang ulitawo. Apan pait ang pahiyom nga nakita ni Salie nga miaslay sa mga ngabil niini.

“Unta...” miingon si Allan.

Napahunong si Salie sa paghungit. Tul-id nga mitan-aw kang Allan. Unya may nahinumdoman siya. Ug natugkad gilayon niya nganong ingon niadto ang sumbalik sa ulitawo. Nabalita kadto nga kalit lang nahanaw ang sikat nga modelo nga si Amanda Miranda. Nabaniog pag-ayo kadtong hitaboa. Gidudahan gani kadto nga gikidnap kini. Apan natin-aw ang tanang mga katahap dihang nakit-an sa mga ginikanan sa dalaga ang sulat niini nga nangayo’g pasaylo kanila sa iyang pagbiya. -- Sumpayan pa