Mata sa Kasingkasing

Gula 41

Miuyon si Angeline. Mao nga human sa ilang klase, mihapit lang sila sa ilang boarding house aron pagkuha sa pipila ka gamit ug milahos dayon sila sa bus terminal sa Dao. Naabtan pa gyud nila ang kataposang biyahe sa Dinorog Transit paingon sa Mabini.

Dihang nakalarga na ang bus, nalingaw si Angeline nga nagtan-aw sa mga dapit nga ilang naagian. Unang higayon kini nga nakabiyahe siya sa rota nga Tagbilaran-Mabini. Nabag-ohan siya sa mga talan-awon nga iyang nakita.

Pag-abot nila sa lungsod sa Dimiao, dihay private vehicle nga mi-overtake sa bus nga ilang gisakyan. Mora’g familiar ni Angeline ang maong sakyanan. Susama kini sa sakyanan nga pagadad-on ni Erik sa eskuylahan.

“Layo pa ba ta?” Gipangutana ni Angeline si Vera pag-abot nila sa lungsod sa Jagna.

“Moagi pa ta’g upat ka lungsod sa di pa ang amo,” ni Vera.

Wala mopasupot og laing pangutana si Angeline.

Ang barangay nila ni Vera may gilay-on nga pito ka kilometro gikan sa kinapusoran sa lungsod sa Mabini. Gipara nila ang bus nga ilang gisakyan tungod gayod sa basketbolan sa sentro sa barangay Lungsodaan. Nanganaog sila. -- Sumpayan pa