Panagbuwag atol sa Valentine's Day

Human sa makutas nga kombate sa ibabaw sa kama sulod sa mabugnaw’ng motel (tulo gyud ka hugna) nilang Doning ug Gingging, nagkulokabildo sila. Moulyap-ulyap pa panagsa ilang mga dughan sa kakutas. Pilitpilit pa ilang mga singot. Hubo pa ilang mga lawas nga nagparayganay.

Nag-unlan si Gingging sa toong bukton ni Doning ug nagduladula siya’s balhibo sa dughan sa naulahi samtang nagtanday ang toong tuhod ni Gingging ibabaw sa bilahan ni Doning.

“Anus-a kaha kutob ning atong kinawatkawat nga kalipay?” inosenteng pangutana ni Gingging sa kabit.

Nakapanghupaw si Doning. Ug daling nitubag.

“Maayo kay nakapangutana ka ana. Akseptado gyud diay ka nga some good things never last, sa kanta pa ni Barbra Streisand” ni Doning.

“Nothing good last forever, sa libro pa ni Sidney Sheldon” ni Gingging. Hilaw ang pahiyom nga nagtutok sa kadulog. Niminghoy ang nawong ni Doning.

Nabaniog na sa tabitabi ilang relasyon sa ilang baryo diin puro sila barangay councilors. Ila na lang masigka kapikas ang wa kadungog sa tabi. Kay ang mga libakero ug libakera sa ilang baryo, gihimuan man sila’g alyas. Open kaayo sa pundokpundok sa mga eskina ug estambayanan ilang relasyon ug ang paglibak nila. Kay nagsalig sila nga way mosumbong sa ilang mga kapikas.

Ang bana ni Gingging nga si Edwin, tuas abroad ug tinuig mouli. Ang asawa ni Doning nga si Abet bisi kaayo isip head nurse sa usa ka dakong ospital sa dakbayan. Pirming lapoy inig uli sa balay. Mokaon la’g kadiyot unya matulog dayon.

Ulitawo’g daga na ilang mga anak. Tulo ang anak ni Doning. Duhang lalaki usa ka babaye. Kang Gingging tulo sab. Duha babaye, usang lalaki. Walay paghikutar ilang mga anak sa ilang mga lakaw. Silang duha pirmi paapilon og mga seminar ug symposium alang sa mga barangay, sa ilang barangay captain. Nagdahum lang ilang mga anak nga opisyal kanunay ilang mga lakaw.

“Nakamatikod ka nga sa usa ka tuig natong panagrelasyon, karon lang nahitabo nga tulo ka hugna atong pagtagay sa himaya?” ni Doning.

“Bitaw. Kasagaran tagsa ra man gyud unta ta ka hugna. Daghan na nang makaduha” ni Gingging.

“Daw panamalit na man seguro ning ato” dugang niya.

“Mao gyud, Ging. Kay una nasakpan na ko ni Gary akong panganay. Kadtong didto tas videokehan dapit sa pantalan, didto man sab diay siya ug iyang mga barkada sa kilid nga kan-anan. Sweet kaayo ta didtong nagkantahay ug nagtagayay og beer. Mora gyud ta’g teenager nga manag-uyab. Gihulga ko niyang isumbong ni mama niya. Akong giingnan nga highblood ra ba iyang mama. Atakehon gani siya, ikaw gyud ang mabasol. Akong gihulga sab. Unya nidugang og hulga nga di na siya magtinarong og eskuyla. Ug moapil siya’g bisyo sa drugas. Maoy akong gikahadlokan” ni Doning. Niping-it.

“Duna na bitaw nagsunodsunod nako...Sinugo tingale sa akong bana. Duna na gyu’y nipindot niya nga papanid-an ko” timang ni Gingging. May kahadlok ang nawong.

“Nahibulong na sab akong misis nga kanunay kong way kuwarta. Nga dako man ta ko’g sweldo sa banko akong gisekyuan. Nakapangayo na sab ko’s akong igsoon sa abroad. Gisultihan ko nga duna gyud kono koy bisyo kay nganong kulang akong kuwarta. Bisa’g motampo ka’s atong gasto kada adlaw nato, mas dako man gyud ako” ni Doning.

“Gipangutana sab bitaw ko ni Meme akong kinamaguwangan. Kun kinsa kuno sila si Trining ug Pepeng. Trining ug Pepeng man diay atong ngan kun maghisgut ang mga balhiboo’g dila nato” ni Gingging.

“Ako sab, gitambagan ni Auntie Eleanor nga konsehala sab sa atong baryo. Nga angay tang maghimog maayong panig-ingnan sa atong barangay. Dili maghimo’g hugaw nga sumsuman sa katilingban” ni Doning.

“Unya? Mag-ilis na lang ta?” ni Gingging. Nitimbakuwas.

“Sigi. Kay mora’g gabii na man. Pangitaon na unya tas ato” ni Doning. Nibangon sab.

“Magbuwag tas maayong kabubut-on” ni Gingging. Nipahiyom. “Sama lang gihapos way nahitabo” ni Doning. Nipahiyom sab. “Happy Valentine’s” ni Gingging.

“Same to you” ni Doning. “Friends” nag-apir sila. Naggakos. Hugot kaayo. Naghawok. Ngabil sa ngabil. Dugay’ng nag-ukang. Sa pag-ukang nila, nag-iyahay og punit sa ilang mga sinina sa sawog sa motel. Naglumba sila’g sul-ob sa ilang mga sapot. (Katapusan)